MANILA, Philippines – Itinanggi ng Malakanyang ang akusasyon ni Davao City Mayor Sebastian “Baste” Duterte na di umano’y may umiiral na “undeclared martial law” sa bansa.
Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na taga-media ang unang makararamdam kung may umiiral na “undeclared martial law” sa Pilipinas.
“Unang-una po, kayo po ang makakaramdam, kayong mga taga-media, kung mayroon po bang mga implied martial law na nagaganap. Ang pagbibigay ng kalayaan at hindi pagsawata at hindi pagkitil sa mga taga-media at iba nating mga kababayan ng kanilang karapatan lalung-lalo na itong freedom of the press and freedom of expression, hindi po ito sinasawata ng Pangulo,” diing pahayag ni Castro.
Winika pa ni Castro na mas naramdaman ang sinasabi ni Mayor Baste na undeclared martila law sa panahon ng panunungkulan ng kanyang ama na si dating Pangulong Rodrigo Duterte.
“Marami ang mga taga-media na tumutol sa ginagawang pagkitil ng freedom of the press and freedom of expression sa panahon ni dating Pangulong Duterte,” anito.
Nauna rito, tahasang sinabi ni Mayor Baste na sumasailalim umano ang bansa sa “undeclared martial law” kahit walang pormal na deklarasyon.
“You know tama si Mike [Defensor], this is not even a silent martial law, it is martial law without declaring it formally,” ang sinabi ni mayro Duterte sa naging talumpati nito sa paglulnsad ng Rage Coalition para sa Mindanao. (KRIS JOSE)
