MANILA, Philippines – Inilabas ng Supreme Court of the Philippines nitong Lunes, Mayo 25, 2026, ang resolusyon nito na tumatanggi sa petisyon ni Sen. Ronald dela Rosa para sa temporary restraining order (TRO) laban sa posibleng pag-aresto sa kanya kaugnay ng warrant na inilabas ng International Criminal Court.
Sa botong 9-5-1, sinabi ng Korte Suprema na nabigo si Dela Rosa na patunayan ang agarang pangangailangan para sa injunctive relief at wala umano siyang “clear and unmistakable right to be protected.”
Pinangunahan ni Chief Justice Alexander Gesmundo ang mayorya kasama sina Senior Associate Justice Marvic Leonen at Associate Justices Alfredo Benjamin Caguioa, Filomena Singh, Rodil Zalameda, Samuel Gaerlan, Jose Midas Marquez, Joseph Lopez, at Rodil Villanueva. Naka-leave naman si Associate Justice Japar Dimaampao nang talakayin ang usapin.
Kabilang sa mga dissenting justices sina Associate Justices Amy Lazaro-Javier, Ramon Paul Hernando, Ricardo Rosario, Antonio Kho Jr., at Henri Jean Paul Inting.
Hiniling ni Dela Rosa sa SC na pigilan ang mga lokal na awtoridad sa pagpapatupad ng ICC arrest warrant laban sa kanya nang walang warrant mula sa lokal na hukuman. Iginiit niya na nilalabag nito ang kanyang karapatan sa kalayaan, due process, at kakayahang gampanan ang kanyang tungkulin bilang senador.
Ngunit sinabi ng SC na ang mga karapatang iginigiit ni Dela Rosa ay “heavily disputed and highly contingent” sa pangunahing petisyon.
“There is no material and substantial invasion of Senator dela Rosa’s rights. In the first place, Senator dela Rosa has no clear and unmistakable right to be protected. He was also given protective custody by the Senate in the interim, which prevented the alleged service or implementation of the ICC warrant as well as his arrest,” ayon sa SC.
Tinukoy rin ng hukuman ang naging pahayag ni Pangulong Ferdinand Marcos Jr. na wala pa siyang inilalabas na direktiba para arestuhin si Dela Rosa.
“Hence, Senator dela Rosa’s claimed invasion of his purported rights is more imagined than real,” ayon pa sa SC.
Sa hiwalay na dissenting opinion, sinabi ni Associate Justice Amy Lazaro-Javier na ang pagtanggi sa TRO ay naglalantad kay Dela Rosa sa hindi na maibabalik na pinsala.
“To capture a citizen and hand him over to an international body by executive fiat is to usurp the judiciary’s exclusive constitutional role and to erode the bedrock principle of separation of powers,” ani Lazaro-Javier.
Dagdag pa niya, ang pagsuko sa isang mamamayan sa dayuhang hukuman nang walang judicial oversight ay magbibigay sa ehekutibo ng kapangyarihang pagkaitan ng kalayaan ang isang tao nang walang judicial finding of probable cause.
“Once surrendered, no writ of habeas corpus, no petition for certiorari, no mandamus, and no subsequent ruling of this Court – no matter how favorable – can retrieve him from foreign custody or restore the constitutional protections denied to him,” dagdag niya.
Samantala, sinabi naman ni Associate Justice Maria Filomena Singh sa kanyang concurring opinion na hindi natugunan ni Dela Rosa ang mga rekisito para sa injunctive relief at may indikasyon umano ng bad faith sa kanyang mga naging hakbang bago naghain ng petisyon.
“As a final note, the main issue in this case is accountability, under our Constitution, under our local laws, under the Rome Statute, under general principles of international law, as correctly framed by the parties,” ani Singh. RNT
