MANILA, Philippines – MULING pinagtibay ng Pilipinas at Japan ang kanilang commitment na gawing “world-class economic hub” ang Luzon Economic Corridor (LEC).
Kinilala ang strategic role nito sa pagpapalakas sa regional economic architecture at global supply chain resilience.
Sa isang joint statement kasunod ng summit meeting sa Tokyo, Japan, araw ng Huwebes, kapwa nangako sina Pangulong Ferdinand R. Marcos Jr. at Japanese Prime Minister Sanae Takaichi na mas palalimin pa ang pagtutulungan sa high-impact infrastructure at economic initiatives sa ilalim ng LEC framework.
Kabilang sa mga prayoridad na aspeto ang “rail at port modernization, clean energy, semiconductor supply chains, digital connectivity, agribusiness, at civilian port upgrades.”
“They also reaffirmed their strong commitment to transforming the LEC into a world-class economic hub that strengthens global supply chains, accelerates economic development, and delivers mutual economic prosperity,” ang mababasa sa joint statement.
Ang LEC ay isang trilateral initiative kung saan kasama ang Philippines, Japan, at Estados Unidos, na naglalayong paghusayin ang “connectivity at economic growth” sa Luzon, partikular na sa Subic-Clark-Manila-Batangas corridor.
Kapwa naman kinilala ng Pilipinas at Japan ang kahalagahan ng trilateral cooperation kasama ang Estados Unidos at koordinasyon kasama ang like-minded partners gaya ng Australia at India upang pagtibayin ang isang “free and open” international order base sa rule of law.
Binigyang-diin naman ng dalawang lider ang pagpapalakas sa “infrastructure connectivity and resilience” sa pamamagitan ng Official Development Assistance (ODA) ng Japan na hindi lamang mahalaga sa economic growth ng Pilipinas kundi maging sa regional stability.
Kaugnay nito, muli namang pinagtibay ng Japan ang suporta nito sa “high-quality, resilient, and sustainable infrastructure development” para makatulong sa pagsulong ng “economic at social transformation” ng Pilipinas.
Kapwa sinang-ayunan naman ng dalawang bansa na mas palalimin pa ang pagtutulungan sa economic security, kabilang ang pagsisikap na “to strengthen resilient and diversified supply chains in critical minerals, renewable energy, automotive manufacturing, at advanced technologies such as artificial intelligence (AI).”
Gayundin, committed ang mga ito na paigtingin ang kolaborasyon hinggil sa digital infrastructure, kabilang na ang undersea cables at 5G Open RAN technologies, habang pino-promote ang “secure at trustworthy AI ecosystems” sa pamamagitan ng Japan-ASEAN Co-creation Initiative para sa AI.
Para naman sa trade and investment, kapwa binigyang-diin ng mga ito ang kahalagahan ng ganap na implementasyon ng umiiral na kasunduan gaya ng Philippines-Japan Economic Partnership Agreement, ASEAN-Japan Comprehensive Economic Partnership, at Regional Comprehensive Economic Partnership.
Nagpahayag din ng suporta ang Japan sa planong accession ng Pilipinas sa Comprehensive Agreement for Trans-Pacific Partnership.
Para naman sa energy sector, kapwa sinang-ayunan ng dalawang lider ang “expand cooperation” sa ilalim ng Asia Zero Emission Community, kabilang ang liquefied natural gas, offshore wind, at civilian nuclear energy, na sinasabing subject sa developments ukol sa Philippine side. (Kris Jose)
