BINIGYANG-DIIN ni Pangulong Ferdinand R. Marcos Jr. ang kahalagahan na pagtibayin ang international law, maritime security, at isang rules-based order sa Indo-Pacific sa kanyang naging historic address sa harap ng National Diet, national legislature ng Japan.
Sa pagsasalita sa mga miyembro ng parlyamento ng Japan sa panahon ng kanyang four-day state visit, inilarawan ni Pangulong Marcos ang Pilipinas at Japan bilang “maritime democracies” na committed na panatilihin ang regional seas na “open, secure, and governed by rules, not by force.”
“As maritime democracies, the Philippines and Japan are committed to strengthening maritime security and ensuring that our seas remain open, secure, and governed by rules, not by force,” aniya.
Kapwa naman ang Pilipinas at Japan ay may territorial disputes sa Tsina.
Sa ulat, pinaigting ng Beijing ang mga aktibidad nito sa South China Sea, kabilang na ang West Philippine Sea na nasa loob ng exclusive economic zone ng Maynila.
Bukod dito, inaangkin din ng Tsina ang Japanese-controlled Senkaku Islands sa East China Sea.
Sa naging talumpati ng Pangulo, binigyang-diin nito ang ebolusyon ng Philippine-Japan relations mula post-war reconciliation na naging strategic partnership na nakaangkla sa “deep mutual trust.”
“The relationship between the Philippines and Japan is at its core a story of transformation from reconciliation to deep mutual trust,” ang winika pa rin ng Pangulo.
Inalala rin ni Pangulong Marcos kung paano isinulong ni dating Pangulong Elpidio Quirino ang pagkakasundo sa mga Hapon kasunod ng World War II, na nagbigay daan para maging normal ang diplomatic relations noong 1956.
Ngayong taon ay minarkahan ang ika-70 anibersaryo ng pag-normalisa sa diplomatic relations sa pagitan ng Pilipinas at Japan.
Binigyang-diin din ng Pangulo ang lumalaking saklaw ng bilateral cooperation, kabilang na ang “security, maritime and defense cooperation, resilient supply chains, artificial intelligence, space technology, clean energy, at digital innovation.”
Binanggit din ni Pangulong Marcos ang papel ng Japan bilang isa sa “leading economic partners at largest providers ng development assistance” ng Pilipinas.
“Peace is the foundation upon which our shared prosperity is built,” ayon sa Pangulo.
Gayundin, muli namang pinagtibay ng Pangulo ang commitment ng Pilipinas sa mapayapang pagsasaayos sa pinagtatalunang katubigan sa ilalim ng international law, kabilang na ang United Nations Convention on the Law of the Sea (UNCLOS).
“In July of this year, we mark the 10th anniversary of the Arbitral Award on the South China Sea, which embodies the Philippines’ determination to resolve disputes through peaceful means and mechanisms provided under international law,” aniya.
Tinukoy din ng Pangulo ang kontribusyon ng halos 360,000 Filipino na nagtatrabaho sa Japan, sa mga sektor na gaya ng “healthcare, education, manufacturing, agriculture, at services.”
Samantala, si Pangulong Marcos ang pang-apat na lider ng Pilipinas na nagsalita sa harap ng National Diet, kasunod nina Quirino, Gloria Macapagal-Arroyo, at namayapang Benigno Aquino. (Kris Jose)
