BACOLOD CITY — Isang sundalo ng 79th Infantry Battalion (IB) ang nasawi matapos makasagupa ang mga natitirang miyembro ng New People’s Army (NPA) sa Barangay Tamlang, Escalante City, Negros Occidental nitong Lunes ng hapon.
Ayon kay Lt. Col. Eric Alfonso, commander ng 79th IB, nakasagupa ng militar ang mga rebeldeng komunista na iniuugnay sa serye ng pagpatay sa mga sibilyan sa hilagang bahagi ng Negros. Minomonitor umano ng militar ang lugar matapos makatanggap ng impormasyon na may plano ang grupo na magsagawa ng panibagong pag-atake laban sa mga sibilyan.
Sinabi ni 1st Lt. Fevie Fajardo, civil-military operations officer ng batalyon, na nakipagpalitan ng putok ang mga sundalo sa humigit-kumulang limang miyembro ng mga labi ng Northern Negros Front ng NPA sa loob ng halos 10 minuto.
Matapos ang bakbakan ay umatras ang mga rebelde, dahilan upang magsagawa ng pursuit operations ang militar na nagpapatuloy hanggang Lunes ng gabi.
“These communist terrorists were responsible for the recent killings of two civilians in Calatrava on May 5 and May 14,” ani Fajardo.
Dagdag niya, ang ulat hinggil sa planong pag-atake ng grupo sa Escalante City ang nagtulak sa pagdeploy ng mga sundalo ng 79th IB na nauwi sa engkuwentro.
Samantala, isang hinihinalang miyembro ng rebeldeng grupo ang inaresto sa isang pinagsamang checkpoint ng Armed Forces of the Philippines (AFP) at Philippine National Police (PNP) sa Barangay Mabini, Escalante City, bandang alas-4 ng hapon nitong Lunes.
Narekober sa suspek ang isang .45-caliber pistol. Ayon kay Fajardo, nagmula umano ito sa Barangay Tamlang.
