MANILA, Philippines – Tumestigo si prosecution witness at Department of Public Works and Highways (DPWH) engineer John Carlo Rivera nitong Martes, Hunyo 2, at sinabing nasa limang contractor ang nagbayad ng P10 milyon kada proyekto bilang commitment fee o kickback fee kay dating DPWH Bulacan 1st District Engineering Office district engineer Henry Alcantara.
Si Rivera, Engineer 2 sa DPWH Bulacan 1st District Engineering Office, ay nagbigay ng kanyang testimonya sa paglilitis para sa malversation case na inihain laban kay dating senador Ramon Bong Revilla, Jr. at anim iba pa.
Sangkot sa kaso ang P92.8 milyong ghost flood control project sa Pandi, Bulacan na wala namang istruktura.
Sinabi ni Rivera na inatasan siya ni Alcantara na mag-ipon ng listahan ng flood control projects na popondohan sa ilalim ng national budget, kasama ang project proponents o mga opisyal ng pamahalaan at mga kontraktor na nagbayad ng commitment fee matapos igawad ang proyekto.
Ani Rivera, ang mga contractor ay nagbayad ng 25% hanggang 30% ng commitment fee. Kabilang sa mga nagbayad ay ang:
JB Construction
Triple A Construction
Topnotch Catalyst Builders Inc.
Floordesk Construction
IM Construction
Ferdstar Builders, among others.
“Iyon po ang nare-recall ko. Iyon po ang madalas [na magbigay ng commitment fee],” sinabi ni Rivera.
“Each of them would give commitment fee three to four times…worth around P10 million per project,” dagdag pa ni Rivera.
Aniya, ang commitment fee kada contractor at corresponding proponent ay tinutukoy ni Alcantara.
Nang tanungin naman ng mga husgado ng Sandiganbayan kung bakit niya sinusunod ang utos ni Alcantara, sinabi ni Rivera na gusto niyang ma-promote.
“Naka-detail po kasi ako sa kanya,” sinabi ni Rivera. RNT/JGC
