MANILA, Philippines – Inaprubahan ng 17th Sangguniang Panlalawigan ng Cebu ang resolusyon na magbibigay-daan sa paglalabas ng P10 milyon ng financial assistance sa General Santos City kasunod ng magnitude 7.8 na lindol na tumama sa Mindanao nitong Lunes, Hunyo 8.
Sa resolusyon na inakdaan ni Provincial Board Member Red Duterte, at sinertipikahang urgent ni Governor Pam Baricuatro, ay nilalayong magbigay ang pamahalaang panlalawigan ng humanitarian aid sa naturang lungsod.
“General Santos City is not the only area affected by this calamity. We must also determine which other local government units need urgent support so that assistance can be extended to them as soon as possible,” sinabi ni Duterte.
Inilarawan din ang financial assistance bilang “gesture of solidarity and reciprocity.”
Ito ay dahil sa pagtulong din ng lungsod sa kanila sa pamamagitan ng P8 milyong halaga ng humanitarian aid sa Cebu nang tumama ang magnitude 6.9 na lindol sa Bogo City noong Setyembre 30, 2025. RNT/JGC
