MANILA, Philippines – Kinumpirma ni Senador Vicente Sotto III na may seryosong banta sa seguridad ng Senado kabilang ang mga mambabatas, empleyado at bisita na walang ibang layunin kundi paguluhin ang bansa habang papalapit ang impeachment trial.
Sa panayam ng Senate media, sinabi ni Sotto na nalaman niya ang report hinggil sa security threat sa Senado na unang nakalap ng National Bureau of Investigation (NBI) na kinukumpirma ngayon ng security at intelligence agencies.
“Yes, I overheard the report. Security measures are being planned,” ayon kay Sotto.
“Very serious, ayon sa intel,” dagdag ni Sotto.
Ngayon, June 9, nakatakdang magpadala ng Notice of Pre-Trial ang Impeachment Court kay Vice President Sara Duterte alinsunod sa inaprubahang Rules of Court kamakailan.
“The threat is a clear and present danger therefore serious consideration must be taken,” aniya.
Sinabi pa ni Sotto na magdedesisyon ang bagong mayorya kung isususpinde ang trabaho at committee hearings at meeting sa Senado sakaling mapag-aralan nang husto ng security at intelligence agencies ang impormasyon at sitwasyon sa bansa.
“Depend on the security measures. Not my call,” ayon pa kay Sotto.
Kamakailan, inihayag ng Palasyo na itutuloy ang selebrasyon ng Araw ng Kalayaan sa Hunyo 12 kahit may banta ng kudeta sa ilang ‘disgruntled members” ng Sandatahang Lakas ng Pilipinas upang pigilan ang impeachment trial ni Duterte.
Nakatakdang buksan ang sesyon ng Senado sa Hulyo 26 para sa ikalawang regular session ng 20th Congress. Ernie Reyes
