MANILA, Philippines – Sinabi ni Batangas Rep. Gerville Luistro na mahalaga ang pagsusumite ng pre-trial brief sa Hunyo 15 at ang pre-trial conference sa Hunyo 18 dahil dito unang makikita ng prosecution at publiko kung paano sasagutin ng kampo ni Vice President Sara Duterte ang mga alegasyon laban sa kanya.
Ayon kay Luistro, ito ang maaaring unang pagkakataon na ilalahad ng kampo ni Duterte ang kanilang mga ebidensya at mga testigo upang kontrahin ang mga nakasaad sa Articles of Impeachment.
Sinabi niya na mula pa noong mga pagdinig sa Kongreso hanggang sa isinumiteng sagot ng Bise Presidente sa impeachment court, wala pa umanong naipapakitang ebidensya o listahan ng mga testigo ang depensa.
Noong Lunes, nagsumite ang House prosecution panel ng manifestation sa impeachment court sa halip na reply sa sagot ni Duterte. Ayon sa kanila, hindi na kailangan ng point-by-point na tugon dahil nakatuon umano ang sagot ng depensa sa mga usaping konstitusyonal, procedural, at teknikal, sa halip na direktang sagutin ang mga paratang.
Dahil dito, sinabi ni House prosecution spokesperson Zia Alonto Adiong na tila wala pang inilalatag na depensa ang kampo ng Bise Presidente laban sa mga alegasyon at mas nakatuon ito sa pagpapa-dismiss ng kaso.
Gayunman, sinabi ni Luistro na naghihintay pa rin silang makita kung maglalabas ng ebidensya at mga testigo ang kampo ni Duterte sa pre-trial brief at conference.
Noong Mayo 11, 257 mambabatas ang bumoto pabor sa pag-adopt ng Articles of Impeachment laban kay Duterte, habang 25 ang tumutol at siyam ang nag-abstain.
Ang mga pangunahing alegasyon sa impeachment ay kinabibilangan ng:
-Umano’y maling paggamit at iregularidad sa confidential funds ng Office of the Vice President at Department of Education;
-Umano’y pagkakaroon ng hindi maipaliwanag na yaman;
-Umano’y pagbibigay ng pera sa ilang opisyal ng DepEd upang malabag ang procurement rules;
-At umano’y pagbabanta laban kay Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Nakatakdang magsimula ang pormal na impeachment trial pagkatapos ng pre-trial proceedings. RNT/MND
