MANILA, Philippines – NAREKOBER ang isang pinaghihinalaang piraso ng rocket debris sa baybayin ng Sitio Taburo, Bisucay Island, Cuyo, Palawan nitong Miyerkules ng umaga, ayon sa Coast Guard Station Eastern Palawan.
Sinabi ng Philippine Coast Guard na natanggap nito ang ulat bandang 6:46 ng umaga kaya agad na nag-deploy ng Quick Response Team (QRT) sa lugar.
Narekober ang naturang bagay sa tulong ng mga lokal na opisyal ng barangay at kasalukuyan nang naka-secure.
Magsasagawa ng technical assessment ang Maritime Safety Law Enforcement Group–Palawan (MARSLEG-PAL) upang matukoy ang pinagmulan at uri ng narekober na bagay.
Tiniyak ng Philippine Coast Guard sa publiko na ipinatutupad ang kaukulang safety measures habang nagpapatuloy ang imbestigasyon. Jocelyn Tabangcura-Domenden
