MANILA, Philippines – Arestado na ng Taguig City Police Station ang lahat ng indibidwal na kabilang sa top 10 Most Wanted Persons list nito para sa buwan ng Hunyo, na pag-uulit sa kaparehong tagumpay nito mula Enero hanggang Abril.
Sinabi ni TCPS chief Col. Julius Añonuevo na naisagawa ang mga pag-aresto sa pamamagitan ng intelligence monitoring, targeted manhunts, at pakikipagtulungan sa law enforcement partner agencies at community stakeholders.
Nahaharap ang mga suspek sa iba’t ibang kasong kriminal, kabilang ang statutory rape, child abuse, statutory sexual assault, qualified rape, illegal drug offenses, robbery, carnapping, at assault upon a person in authority.
Nasa kustodiya na ng pulisya ang lahat ng naarestong indibidwal habang hinihintay ang kanilang legal proceedings.
“Every wanted person arrested is another step toward making our communities safer. We thank the public and our partner agencies for their continued cooperation, and we assure our residents that the Taguig City Police will remain relentless in pursuing those who are evading justice,” dagdag ni Añonuevo. RNT
