MANILA, Philippines – Madidismaya ang taumbayan sa naging desisyon ni Vice President Sara Duterte na hindi dumalo sa paglilitis ng Senare impeachment court, ayon kay House Trial Spokesperson Zia Adiong.
Ayon kay Adiong, naghahanap ng kasagutan ang taumbayan at ang desisyon ni Duterte na hayaan ang kanyang mga abogado na sumagot sa mga bawat kaso ay ikalulungkot ng taumbayan na nag aabang ng mga direktang sagot mula sa Pangalawang Pangulo.
Aniya, ang personal na pagharap ni Duterte ay magpapakita sanang seryoso itong sagutin ang mga akusasyon at patutunayan na handa siyang panindigan ang kanyang sinasabi na pagiging inosente.
“That would also reinforce her previous statements that she will answer in the proper forum… and this is now the proper forum. The clearest message that she can send is to appear before the court,” giit ni Adiong.
Para naman kay legal spokesperson Atty. Benjamin Tolosa Jr, iginagalang ng prosekusyon ang patakaran ng impeachment court na nagbibigay ng laya kay Duterte na pumili kung personal na dadalo o dadaan sa counsel.
“We will still respect the rules of impeachment and the order issued by the impeachment court wherein the Vice President was given an option to appear either in person or through counsel,”ani Tolosa.
Gayunpaman, batid umano ng panel ang sentimyento ng publiko na nagnanais na makita nang personal ang Pangalawang Pangulo na haharapin ang mga kaso.
“Everyone’s demanding that the Vice President will face this in person.”paliwanag ni Tolosa.
Para naman kay Trial Spokesman Renee Co, matagal nang naghihintay ang mga mamamayan para sa pananagutan kaya nakapanghihinayang ang hindi pagpapakita ni Duterte.
Bagamat diskarte ito ng depensa, ipinaalala ni Co na ang impeachment ay hindi lang legal kundi isang ‘political process’ kung saan may say ang taumbayan.
“She can have her strategy… but at the end of the day this impeachment process is both a legal and political process that we want the people to participate in,” pagtatapos pa ni Co. Gail Mendoza
