VP Sara nasa Senado pero ‘di dadalo sa impeachment trial

MANILA, Philippines — Makikipagpulong si Vice President Sara Duterte sa kaniyang legal team sa Senado nitong Martes ngunit hindi siya dadalo sa kaniyang impeachment trial, ayon sa kaniyang kampo.

“Darating si Vice President Sara Duterte in a few minutes, but she will only be here for a meeting with the defense team. Mayroon kaming napag-usapan na magkikita kami today dito sa holding room ng defense team para mapag-usapan ang ilang bagay-bagay, but she will not be attending the hearing this afternoon,” ayon kay defense spokesperson Michael Poa.

“She has engagements din po kasi. That’s why she’s here in Manila and she will have to proceed to her engagements after our meeting,” dagdag niya.

Kinumpirma rin ni Senate Secretary and Impeachment Clerk of Court Renato Bantug Jr. na inaasahang darating si Duterte sa Senado.

“Yes, anytime now,” ani Bantug.

Nang tanungin kung bakit sa Senado itinakda ang pulong, sinabi ni Poa na nag-adjust umano si Duterte para sa convenience ng kaniyang defense team na may 2 p.m. hearing.

“The Vice President has always been the type of person that will adjust to the convenience ng ka-meeting niya,” ani Poa.

“Mayroon kaming 2 p.m. hearing… Minarapat niya na dito na lang kami magkita para sa ganoon hindi na kami ma-inconvenince,” dagdag niya.

Kinumpirma naman ni Senate Sergeant-at-Arms Alfred Corpus na nakita sa Senado ang security team ni Duterte kaninang araw. Sinabi rin ni Corpus na duda siyang bibisita si Duterte sa mga senador dahil nakaupo na ang mga ito bilang mga hukom sa kaniyang impeachment trial.

Hindi rin dumalo si Duterte sa unang araw ng kaniyang impeachment trial noong Lunes. Sa isang pahayag, sinabi niyang ang pagdalo sa proceedings ay “matter of legal strategy and constitutional rights.” RNT