TACLOBAN CITY — Sinuspinde ng pamahalaang lungsod ng Catbalogan sa Samar ang mga face-to-face na klase at ipinatupad ang work-from-home (WFH) para sa karamihan ng mga empleyado ng lokal na pamahalaan habang patuloy na lumalala ang krisis sa suplay ng tubig bunsod ng mga pinsalang dulot ng ilang araw na malakas na pag-ulan.
Sa isang pahayag noong Lunes, sinabi ni Mayor Dexter Uy na nananatiling kulang ang suplay ng tubig sa ilang lugar sa Catbalogan kahit humupa na ang ulan ilang araw na ang nakalipas. Ayon sa ulat, nasira ng pagbaha ang sistema ng suplay ng tubig sa lungsod.
Nagsimula ang suspensyon ng face-to-face na klase at ang pagpapatupad ng work-from-home noong Hulyo 6.
Maglalabas ang pamahalaang lungsod ng panibagong abiso kung kailan muling magbabalik sa normal ang mga klase at operasyon ng mga tanggapan.
Ayon sa tanggapan ng alkalde at sa Sangguniang Panlungsod, ilang ulit na silang humingi ng detalyadong paliwanag mula sa Tubig Catbalogan Corporation (TCC) at Catbalogan Water District (CWD) hinggil sa patuloy na kakulangan sa suplay ng tubig.
Sinabi ni Uy na matagal nang nakaririnig ang mga residente ng iba’t ibang paliwanag, pangako, at katiyakan na malulutas ang problema, ngunit sa halip ay lalo lamang itong lumala.
“Ang kakulangan sa tubig ay hindi na isang karaniwang abala kundi isa nang malaking suliraning pampubliko na may malawak na epekto sa pang-araw-araw na pamumuhay ng mga taga-Catbalogan,” ani Uy.
Aniya, naapektuhan ng kakulangan sa tubig ang mga pangunahing pangangailangan ng mga kabahayan tulad ng paghahanda ng pagkain, kalinisan, at maging ang araw-araw na gawain ng mga estudyante at manggagawa.
Bukod sa suspensyon ng klase at pagpapatupad ng work-from-home, inatasan din ng pamahalaang lungsod ang TCC at CWD na magsumite ng komprehensibong ulat tungkol sa kasalukuyang kalagayan ng suplay ng tubig at maglatag ng kongkretong hakbang upang matugunan ang krisis.
Kabilang dito ang pagpapalawak ng water rationing at paglutas sa mga suliraning dulot ng pagkawala ng kuryente at mataas na water turbidity o pagkalabo ng tubig na nakaaapekto sa sistema ng suplay.
Inatasan din ni Uy ang City Legal Office na repasuhin ang umiiral na kasunduan sa pagitan ng TCC at CWD upang matukoy kung dapat ba itong ipagpatuloy, amyendahan, o tuluyang wakasan, at magsumite ng kaukulang rekomendasyon sa mga kinauukulang awtoridad.
Hiniling din ng pamahalaang lungsod na pag-aralan ang pagbibigay ng nararapat na ayuda o relief measures para sa mga consumer na matagal nang apektado ng krisis, kabilang ang posibleng pagbabawas o pagsasaayos ng kanilang bayarin sa serbisyo ng tubig.
Binigyang-diin ni Uy ang pangangailangan ng agaran at matibay na aksyon, at iginiit na nararapat lamang na magkaroon ang mga residente ng maaasahan at tuloy-tuloy na suplay ng tubig. Nanawagan din siya sa mga water service provider na maglatag ng konkretong solusyon at maibalik sa normal ang kanilang operasyon sa lalong madaling panahon.
Hindi kabilang sa work-from-home arrangement ang mga empleyadong nakatalaga sa peace and order, disaster risk management, health and sanitation, at traffic management. Hinikayat din ang iba pang tanggapan ng pamahalaan at pribadong sektor na magpatupad ng kaayusan kung kinakailangan.
