MANILA, Philippines — Sinabi ni Vice President Sara Duterte nitong Martes na mananatili siyang “bloodied but unbowed” sa gitna ng nagpapatuloy na impeachment trial laban sa kaniya sa Senado.
Nagtungo si Duterte sa Senado upang makipagpulong sa kaniyang defense lawyers ngunit hindi siya dumalo sa nakatakdang pagdinig. Sa maikling pagharap sa media, sinabi niya, “in this bloodbath and bludgeoning, I will be bloodied but unbowed.”
Hindi na nagbigay pa ng karagdagang pahayag ang Bise Presidente at hindi rin siya sumagot sa mga tanong ng media.
Bago dumating si Duterte, sinabi ni Atty. Michael Poa na makikipagpulong lamang ang Bise Presidente sa kaniyang legal team at hindi dadalo sa impeachment proceedings nitong Martes dahil sa iba pang engagements.
“Yes, I can confirm na dadating si Vice President Sara Duterte in a few minutes, but she will only be here for a meeting with the defense team,” pahayag ni Poa sa mga reporter.
“Meron kaming napag-usapan na magkikita kami today dito sa holding room ng defense team para magpaliwanag ang ilang bagay-bagay, but she will not be attending the hearing, the scheduled hearing this afternoon,” dagdag niya.
Sinabi ni Poa na nasa Maynila si Duterte ngunit kailangan nitong tumuloy sa iba pang commitments matapos ang pulong, kabilang ang paghahanda ng Office of the Vice President sa pagtugon sa paparating na tropical cyclone.
“She has engagements din po kasi; that’s why she’s in Manila, and she will have to proceed to her engagements after the meeting,” ani Poa.
Itinanggi rin ni Poa na iniiwasan ni Duterte ang impeachment trial, dahil naroon naman sa Senado ang kaniyang mga abogado.
“Yes, hindi po kaya nga po nandito ‘yung mga abogado niya. Kung umiwas po kami eh baka hindi na kami lumahok sa Senado,” aniya.
Dagdag ni Poa, dadalo si Duterte sa impeachment trial kung kinakailangan, batay sa payo ng kaniyang legal counsel.
Pormal na nagsimula ang impeachment trial ni Duterte noong Lunes, Hulyo 6, kung saan nahalal si Senator Francis Escudero bilang bagong presiding officer.
Inimpeach ng House of Representatives si Duterte noong Mayo dahil sa mga alegasyon ng culpable violation of the Constitution, graft and corruption, bribery, betrayal of public trust, at other high crimes.
Noong Mayo 18, nag-convene ang Senado bilang impeachment court. Noong Hunyo 1, naghain naman ang kampo ni Duterte ng sagot sa Articles of Impeachment, kung saan hiniling nitong ibasura ang impeachment case laban sa kaniya. RNT
