MANILA, Philippines – Nagpatotoo noong Martes ang isang laboratory personnel na sumailalim sa quality testing ang mga materyales na ginamit sa umano’y maanomalyang road dike project sa Naujan, Oriental Mindoro, sa pagpapatuloy ng depensa sa kasong malversation laban sa dating Ako Bicol Rep. Zaldy Co at ilang opisyal ng DPWH-Mimaropa.
Ayon kay Leomar John Castro ng Quantum Materials Testing Laboratory Corp., isinailalim sa laboratory tests ang mga materyales na ginamit sa proyekto.
Tumutol ang mga prosecutor sa kanyang testimonya dahil hindi siya nakalista bilang testigo sa pretrial brief ng depensa. Gayunman, pinayagan ng Sandiganbayan Sixth Division ang kanyang testimonya at tinanggap ang kanyang judicial affidavit.
Nauna nang sinabi ni Dennis Abagon, hepe ng DPWH-Mimaropa Quality Assurance and Hydrology Division at isa sa mga akusado, na isinailalim sa tensile strength at chemical composition tests ang steel sheet piles sa isang pribadong laboratoryo matapos pumayag ang noo’y DPWH-Mimaropa Regional Director Gerald Pacanan.
Gayunman, inamin ni Abagon na hindi ipinakita sa test results ang aktuwal na haba ng mga steel sheet piles dahil sample materials lamang ang sinuri, at hindi ang buong mga bakal na ikinabit sa proyekto.
Umiikot ang kaso sa kontrobersyal na road dike project sa Naujan matapos matuklasan nina DPWH Secretary Vince Dizon at Oriental Mindoro Gov. Humerlito “Bonz” Dolor na 3 metro lamang ang haba ng mga naitayong steel sheet piles sa halip na 12 metro na nakasaad sa Detailed Engineering Design. RNT/MDS
