MANILA, Philippines – Inanunsyo ng Department of Migrant Workers (DMW) na pinirmahan nito ang kauna-unahang federal-level bilateral labor agreement kasama ang Canada.
Ito ay magsisiguro sa patas at ligtas na recruitment regulation para sa overseas Filipino workers.
Sinabi ni DMW Secretary Hans Leo Cacdac sa press briefing nitong Biyernes, Hulyo 10, na ang joint declaration of intent (JDI), ay pinirmahan sa apat na araw na working visit ni Pangulong Ferdinand Marcos Jr. sa Canada.
Idinagdag pa na sa ilalim ng joint declaration, ang recruitment at deployment ng mga manggagawa ay pangangasiwaan at babantayan ng batas ng dalawang bansa.
“The elements of the JDI is an emphasis on the legal pathways of migration, where the recruitment and deployment of workers will be governed and regulated by the laws of both countries,” sinabi ni Cacdac.
Layon din ng hakbang na ito na siguruhin ang ethical recruitment at licensing processes, maging ang pagtatatag ng mutual na pagkilala sa worker credentials ng migrant workers.
Nagpaalala naman si Cacdac na ang recruitment fees o iba pang gastos ay hindi sisingilin sa mga manggagawa at job seekers, kabilang ang overcharging schemes ng immigration consultancies.
“No such recruitment fees and related costs shall be charged against the workers and job seekers, including those we are complaining about, the overcharging or charging by Immigration consultancies here in the Philippines with the intent to hire a particular job seeker,” ayon kay Cacdac.
Umaasa naman si Cacdac na ang kasunduan ay isang hakbang tungo sa “making overseas employment safer, fairer, and more accessible for Filipino workers and their families.” RNT/JGC
