MANILA, Philippines – Gagawing technology-enabled Modern Warfare Laboratory ang dating ospital ng Philippine Military Academy (PMA) sa tulong ng Bloomberry Cultural Foundation, Inc. (BCFI), PAGCOR, at PMA.
Nilagdaan ang kasunduan noong Hulyo 10 nina PMA Superintendent Vice Admiral Caesar Bernard Valencia at BCFI President Donato Almeda, na sinaksihan ni PAGCOR Chair Alejandro Tengco.
Ang itatayong dalawang palapag na gusali ay magkakaroon ng lecture rooms, drone simulation at robotics stations, virtual reality simulation rooms, Army, Navy at Air Force simulators, planning rooms, Joint Wargaming Room, at Tactical Command Post Room.
Magkakaroon din ito ng solar panels sa rooftop.
Ayon sa PMA, layunin ng proyekto na sanayin ang mga kadete sa paggamit ng makabagong teknolohiya tulad ng simulation, cyber at information operations, at unmanned systems bilang paghahanda sa modernong digmaan.
Wala pang inilalabas na iskedyul kung kailan matatapos ang proyekto. RNT/MDS
