MANILA, Philippines – Hinimok ng Second Congressional Commission on Education (Edcom 2) ang Department of Education (DepEd) na palakasin ang curriculum sa early childhood at primary education.
Ito ay matapos mapag-alaman na 75% ng Grade 1 students ang natukoy bilang “struggling readers”, batay sa Comprehensive Rapid Literacy Assessment ng DepEd sa pagsisimula ng School Year 2026 to 2027.
Ipinunto ng Edcom 2 na ang mga estudyante ay kailangang makahabol sa Grade2 at Grade 3 levels bago sila magtuloy sa primary education para maiwasan ang malawak na reading gap.
Ngayong school year, nakita na 45 percent o 2.2 milyong Grade 1 hanggang 3 students ang nahihirapang magbasa.
Dahil dito ay ipinanawagan sa DepEd na siguruhing mayroong matibay na ugnayan sa curriculum ng early childhood care and development (ECCD) sa child development centers at daycares, hanggang sa kindergarten, at Grade 1.
Sa ilalim ng Republic Act No. 12199, o ECCD System Act, si Education Secretary Sonny Angara ang nagsisilbing co-chairperson ng ECCD Council para sa ECCD curriculum.
“The law also makes DepEd responsible for children aged five to eight and directs it to recognize early childhood education as the foundation of the learning continuum,” saad sa pahayag ng Edcom 2. RNT/JGC
