MANILA, Philippines — Tutol ang limang senator-judge sa paglalabas ng tax at bank records ni Vice President Sara Duterte kasunod ng kautusan ng impeachment court na i-subpoena ang mga ahensiyang may hawak ng naturang mga dokumento.
Kinilala ni Senate Impeachment Court spokesperson Atty. Reginald Tongol ang mga ito na sina Senators Alan Peter Cayetano, Pia Cayetano, Imee Marcos, Loren Legarda, at Camille Villar.
Ayon kay Tongol, magkakahiwalay na manifestation ang inihain ng limang senator-judge upang ipahayag ang kanilang pagtutol. Gayunman, sinabi niyang hindi pa niya nababasa ang nilalaman ng mga ito.
“Hindi pa po ako privy dun eh. So, hindi ko pa po nababasa. But, I will try to ask about the contents of those manifestations,” ani Tongol.
Inihain ang mga manifestation matapos iutos ni Presiding Officer Francis “Chiz” Escudero ang pagpapalabas ng subpoena sa Bureau of Internal Revenue at Anti-Money Laundering Council para sa tax at bank records ni Duterte.
Sinabi ni Tongol na kailangang humanap ng ibang legal na remedyo ang sinumang partidong nais kuwestiyunin ang desisyon ni Escudero dahil walang probisyon para sa motion for reconsideration sa Senate impeachment rules.
Kapag walang nakasaad na remedyo sa impeachment rules, maaaring gamiting gabay ng mga partido ang suppletory Rules of Court.
“Walang nakalagay na pwedeng mag-motion for reconsideration at kung hindi po inilalagay ‘yung recourse na ‘yun, then they have to find another recourse in the suppletory Rules of Court regarding the issuance of the subpoena,” dagdag pa ni Tongol. RNT
