CEBU, Philippines — Naglabas ang Land Transportation Office (LTO) Region VII ng show cause order at ipinailalim sa 90-araw na preventive suspension ang driver’s license ni Dumanjug, Cebu Mayor Efren Gica matapos ang viral na aksidente sa Minglanilla noong Linggo, Hulyo 19.
Makikita sa isang video si Gica na nagmamaneho ng motorsiklo nang salungat sa daloy ng trapiko sa National Highway bago bumangga sa isang van na kumakaliwa.
Inamin ni Gica na nag-counterflow siya matapos isipin na maluwag ang kalsada. Wala ring nakadisplay na license plate ang kanyang motorsiklo.
Ipinaliwanag ng alkalde na pinoproseso pa ang rehistro ng motorsiklo at kailangang palitan ang plaka nito. Nasa loob umano ng isang bag ang plaka, certificate of registration at official receipt ng sasakyan.
Ayon sa Minglanilla police, nagkasundo ang dalawang panig kaya walang kasong isinampa. Pumayag si Gica na sagutin ang pagpapagawa sa van, habang impounded naman ang kanyang motorsiklo.
Inatasan ng LTO si Gica na personal na humarap sa Region VII Operations Division sa loob ng limang araw mula sa pagtanggap ng kautusan at magsumite ng verified o sworn written explanation kasama ang mga sumusuportang ebidensiya.
“The Show Cause Order cites initial findings and available documentary evidence indicating possible violations of the Land Transportation and Traffic Code, including Reckless Driving, operating a motor vehicle without displaying the prescribed number plate, and being an improper person to operate a motor vehicle, among other administrative sanctions that may be warranted under existing laws and regulations,” pahayag ng LTO.
“Pending the outcome of the administrative investigation and in the interest of public safety and welfare, Mayor Gica’s diver’s license has been placed under a 90-day preventive suspension, effective immediately upon receipt of the Show Cause Order, with an accompanying directive to surrender his original driver’s license to the LTO,” dagdag ng ahensiya. Mary Anne Sapico
