SINGAPORE, Singapore — Nanatiling may pinakamakapangyarihang passport sa mundo ang Singapore, ayon sa pinakahuling Henley Passport Index na inilabas noong Hulyo 21.
Maaaring makapasok ang mga may hawak ng Singapore passport sa 192 destinasyon nang hindi na kailangan ng visa o maaari itong kunin pagdating sa bansa.
Pumangalawa ang United Arab Emirates, Japan, at South Korea na may access sa 188 destinasyon. Pangatlo ang Sweden na may 187 destinasyon, habang magkasalo sa ikaapat na puwesto ang 11 bansang Europeo na may 186 destinasyon.
Nasa ikalimang puwesto ang Austria, Greece, Malta, Portugal, at Switzerland na may access sa 185 destinasyon. Pang-anim naman ang Hungary, Poland, at United Kingdom.
Kasama sa ikapitong puwesto ang Malaysia, Australia, New Zealand, Canada, at apat pang bansang Europeo.
Samantala, nanatiling nasa pinakahuling puwesto ang Afghanistan, na may visa-free o visa-on-arrival access sa 22 destinasyon lamang. Ito ay may agwat na 170 destinasyon kumpara sa Singapore.
Ayon sa Henley & Partners, tumaas ang karaniwang visa-free access ng mga passport sa buong mundo sa 108 destinasyon, mula sa 58 noong 2006.
“20 years of data show that passport power is one of the clearest expressions of a country’s geopolitical capital. It reflects far more than peace or prosperity alone,” saad ni Christian H. Kaelin, chairman ng Henley & Partners.
“The world’s strongest passports belong to nations that other countries want as partners – for trade, investment, security or cooperation. Mobility is ultimately a measure of the value other countries place on their relationship with you.” RNT/MDS
