PANGASINAN, Philippines – Ininspeksyon ni Pangulong Ferdinand R. Marcos Jr., araw ng Huwebes, HUlyo 30, ang bagong ayos na Philippine Fisheries Development Authority (PFDA)-Sual Fish Port Complex sa Pangasinan, bilang bahagi ng patuloy na pagsisikap ng pamahalaan na gawing makabago ang mga pasilidad para sa pangisdaan at palakasin ang suporta sa mga Pilipinong mangingisda.
Pagdating sa fish port sa Barangay Poblacion, Sual, nasaksihan ng Pangulo ang pagbebenta ng 500 sako ng bigas na may subsidiya ng pamahalaan sa halagang P20 kada kilo para sa mga residente bago niya inikot ang mga pinahusay na pasilidad kasama si Department of Agriculture Secretary Francisco P. Tiu Laurel Jr.
Kasama rin sa pag-iinspeksyon sina Pangasinan First District Representative Arthur F. Celeste, Governor Ramon V. Guico III, PFDA General Manager Glen A. Pangapalan, Sual Mayor Liseldo D. Calugay, iba pang mga opisyal ng pamahalaan, at mga kinatawan ng mga samahan ng mangingisda sa lugar.
Suot ang kinakailangang protective gown at bota, sinuri ni Pangulong Marcos ang Refrigeration and Processing Building, kung saan binigyan siya ng briefing hinggil sa rehabilitasyon ng pasilidad at sa mga pagpapahusay sa operasyon nito.
Inikot din ng Pangulo ang classification area, ice storage at chiller rooms, mga seksyon ng fish processing, packing room, blast freezers, boxing area, cold storage facilities, at loading area.
Inaasahang mapapabuti ng pinahusay na fish port ang paghawak at pagpoproseso ng isda, mababawasan ang post-harvest losses, mapapalawak ang pamilihan ng mga mangingisda, at masisiguro ang tuloy-tuloy na suplay ng de-kalidad na isda at iba pang yamang-dagat.
Ang Sual Fish Port ang tanging rehiyonal na fish port sa Hilagang Luzon na idinisenyo upang tumanggap ng malalaking sasakyang pangisda at nagsisilbi sa mga pamayanang mangingisda sa kahabaan ng Lingayen Gulf, kanlurang baybayin ng Pangasinan, at ilang bahagi ng baybayin ng Ilocos.
Kabilang sa modernization project ang rehabilitasyon at pagtatayo ng mga market hall, cold storage facilities, multi-purpose pier, sorting areas, access roads, at iba pang suportang imprastraktura upang mapahusay ang operasyon ng pantalan.
Isinagawa ang rehabilitasyon matapos magdulot ng hindi episyenteng operasyon ang pagtanda ng mga pasilidad at pagkasira ng imprastraktura, na nagresulta sa pagbaba ng dami ng isdang ibinababa sa pantalan mula 485.66 metric tons noong 2024 tungo sa 74.13 metric tons noong 2025.
Bahagi ang proyekto ng pambansang programa ng pamahalaan upang gawing makabago ang mga fish port at palakasin ang supply chain ng sektor ng pangisdaan sa bansa.
Matapos ang pag-iinspeksyon sa pasilidad, nagtungo si Pangulong Marcos sa pier area kung saan nakipagpulong siya sa mga lokal na mangingisda at mga tauhan ng Bureau of Fisheries and Aquatic Resources (BFAR).
Binati rin ng Pangulo ang 28 tripulante ng BRP Cabanigan at BRP Robert Servañez, na dumanas ng water cannon attacks mula sa Chinese Coast Guard habang nagsasagawa ng regular na misyon malapit sa Bajo de Masinloc noong Hulyo 23 at 24.
Nakipagkita rin ang Punong Ehekutibo sa mga kapitan at tripulante ng iba pang sasakyang-pandagat ng BFAR na nakadaong sa pantalan, kabilang ang BRP Datu Dumangsil, BRP Datu Paduhinog, at BRP Joselito.
Sumakay rin si Pangulong Marcos sa BRP Datu Paduhinog para sa isang maikling inspeksyon bago nagsagawa ng maikling talakayan kasama ang mga lokal na opisyal hinggil sa sektor ng pangisdaan at operasyon ng pantalan.
Inaasahang lilikha ang rehabilitasyon ng Sual Fish Port ng mas maraming oportunidad sa kabuhayan sa buong fisheries value chain, habang higit pang pinatitibay ang suporta ng pamahalaan sa mga pamayanang mangingisda sa Hilagang Luzon. (KRIS JOSE)
