COTABATO, Philippines – Patay ang dalawang batang daycare, edad 4 at 5, matapos silang malunod sa isang septic tank na puno ng tubig-ulan sa Purok 10, Barangay Concepcion, Makilala, Cotabato noong Lunes.
Ayon kay Barangay Chairperson Rey Cayare, ang dalawang bata, na kanyang apo at pamangkin, ay umuwi mula sa paaralan at naglaro malapit sa septic tank habang hawak ang kanilang mga lunch box.
Habang naglalaro, aksidente silang nadulas at nahulog sa bukas na septic tank.
Naalerto ang mga residente at agad silang nagtungo sa lugar, ngunit mga lunch box lamang ang nakita nilang lumulutang sa tubig.
Sumisid ang mga responder at nakuha ang dalawang bata mula sa ilalim ng septic tank.
Dinala sila sa Makilala Medical Specialist at kalaunan ay inilipat sa Davao Doctors Hospital sa Davao City, ngunit pareho silang binawian ng buhay. RNT/MDS
