MANILA, Philippines – Sinabi ni Department of Information and Communications Technology (DICT) Secretary Henry Aguda na gumagamit ang mga modernong data center ng water-efficient cooling technologies tulad ng water recycling at desalination, habang isinusulong ng Pilipinas ang Pax Silica AI at data center hub sa Tarlac.
“The machines are water-cooled, but the water isn’t wasted. It just recirculates,” ayon kay Aguda.
“Some data centers even have their own desalination facilities. They take saltwater, convert it into fresh water, and reuse it. In fact, they can even provide water to surrounding communities,” dagdag niya.
Nauna nang nagpahayag ng pangamba ang mga kritiko, kabilang ang Makabayan Bloc, na maaaring makaapekto ang proyekto sa kapaligiran dahil nangangailangan ang mga AI facility ng malaking dami ng tubig at kuryente.
Ipinaliwanag ni Aguda na ang Tarlac ay may mga ilog na maaaring gamitin para sa water recycling, habang ang mga lugar na malapit sa dagat tulad ng Batangas, Bataan, at Cagayan ay angkop para sa desalination systems.
Sinabi rin niya na sapat ang kasalukuyan at planong suplay ng kuryente para sa parehong industriya at mga kabahayan.
“It’s not like when you build a data center, you immediately consume all that power,” aniya.
“Even if nuclear power is still five to six years away, there is enough power—for the data centers and for households,” dagdag pa niya.
Samantala, sinabi ng Department of Energy (DOE) na gumagawa na ito ng department circular upang matiyak ang sapat na suplay ng kuryente para sa mga data center.
“Whether 50 megawatts or 100 megawatts or 5,000 megawatts, we can supply that. But we just need to make sure that anything we do to power a data center or a hub will not put the rest of the country at a disadvantage. So that our consumers here have protection,” ayon kay Energy Secretary Sharon Garin.
Ipinahayag din ni Aguda na patuloy na hinihikayat ng pamahalaan ang mga global technology company tulad ng AWS at Google na mamuhunan sa Pilipinas.
“Right now, I’m doing investment promotion. When I go around, I talk to AWS and Google and tell them, ‘Locate here instead,'” aniya.
Tinataya ng DICT na ang proyekto ay maaaring lumikha ng 180,000 hanggang 500,000 digital jobs sa mga larangan ng AI services, cloud computing, technical support, at iba pang digital occupations.
Sinabi rin ni Pangulong Ferdinand Marcos Jr. sa kanyang ikalimang State of the Nation Address (SONA) na ang Pax Silica ay “will bring quality jobs to our people, accelerate our industrial competitiveness, and revitalize our economy.” RNT/MDS
