MANILA, Philippines – HINDI lamang listahan ng mga proyekto ang ikalimang State of the Nation Address (SONA) ni Pangulong Ferdinand Marcos Jr. Bagkus, malinaw nitong ipinakita ang direksiyon ng administrasyon—palakasin ang ekonomiya, ayusin ang pamahalaan, at matatag na ipagtanggol ang soberanya ng bansa.
Ayon kay Dr. Jose Antonio Goitia, Chairman Emeritus ng Alyansa ng Bantay sa Kapayapaan at Demokrasya (ABKD), ang mga inilahad ng Pangulo sa imprastraktura, agrikultura, edukasyon, kalusugan, pamumuhunan, tax relief, pagpapababa ng singil sa kuryente, at kampanya laban sa katiwalian ay patunay na may kongkretong resulta ang pamahalaan.
“Ang tunay na batayan ng liderato ay hindi ang mga pangako kundi ang mga nagagawa. Ipinamalas ni Pangulong Marcos ang pag-unlad sa pamamahala, serbisyong pampubliko, at pananagutan,” ani Goitia.
Ngunit para kay Goitia, higit na tumatak ang matatag na paninindigan ng Pangulo sa West Philippine Sea at ang muling paggiit sa karapatan ng Pilipinas batay sa 2016 Arbitral Award.
Sa kanyang SONA, binigyang-pugay ni Marcos ang Sandatahang Lakas ng Pilipinas, Philippine Coast Guard, at mga mangingisdang patuloy na nagbabantay sa ating karagatan, bago binigkas ang linyang umani ng malakas na palakpakan:
“Tayo ay mga Pilipino, at hindi tayo sumusuko.”
Para kay Goitia, ipinakita ng Pangulo na ang pagtatanggol sa soberanya ay hindi nasusukat sa maaanghang na pahayag kundi sa prinsipyadong diplomasya, matatag na institusyon, at pagsunod sa pandaigdigang batas.
Aniya, ang 2016 Arbitral Award ay nananatiling mahalagang tagumpay ng Pilipinas na hindi mabubura ng anumang propaganda o pananakot.
Habang papalapit sa huling yugto ng administrasyon, sinabi ni Goitia na ang pinakamahalagang hamon ngayon ay tiyaking magtatagal ang mga repormang nasimulan.
Sa kabuuan, malinaw aniya ang mensahe ng SONA: ang kaunlaran ng ekonomiya, mabuting pamamahala, at matatag na pagtatanggol sa soberanya ay magkakaugnay na layunin para sa mas matatag na Republika.
At gaya ng naging pangwakas ng Pangulo, ito rin aniya ang mensaheng dapat dalhin ng bawat Pilipino:
“Tayo ay mga Pilipino, at hindi tayo sumusuko.
Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield Movement (FDNY). Siya ay nagtapos ng Juris Doctor at Doctor of Philosophy (PhD), at may mga advanced degree sa MNSA, MPA, at MBA. JAY Reyes
