MANILA, Philippines — Hihilingin ng House prosecution sa Senate impeachment court na maglabas ng subpoena para kay Mary Grace Piattos, isa sa mga pangalang nakalista bilang tumanggap ng confidential funds ng Office of the Vice President, ayon kay private prosecution counsel Lorna Kapunan nitong Martes.
Lumitaw ang pangalan ni Piattos sa mga acknowledgment receipt na isinumite ng OVP, na kinukuwestiyon ng Prosecution dahil umano sa pagiging kahina-hinala ng mga ito.
“Isa-subpoena ko nga si Mary Grace Piattos,” sinabi ni Kapunan sa mga mamamahayag bago nagsimula ang ika-12 araw ng impeachment trial ni Vice President Sara Duterte.
“Hinahanap pa namin, hindi namin makita. Kung saan-saan kaming Mary Grace na pumunta hindi namin makita. Papadala namin sa Office of the Vice President yung subpoena,” dagdag niya.
Hindi sinabi ni Kapunan kung kailan pormal na ihaharap ng Prosecution ang kahilingan sa impeachment court.
“Excited ako. Siguro hindi na tayo hihingi ng 3 minute [suspension] kasi energized ako,” biro niya.
Sinabi rin ni Kapunan na kailangan ng Prosecution na magharap ng expert witness upang matukoy at mapatunayan ang mga lagda sa acknowledgment receipts na isinama ng OVP sa mga liquidation report nito.
Kasalukuyang dinidinig ng impeachment court ang Artikulo I ng Articles of Impeachment, na nag-aakusa kay Duterte ng maling paggamit ng P500 milyong confidential funds ng OVP at karagdagang P112.5 milyon mula sa Department of Education. RNT
