MANILA, Philippines – Nanawagan si ACT Teachers Rep. at Deputy Minority Leader Antonio Tinio para sa agarang pagpapalaya sa mga matatanda at may sakit na bilanggong pulitikal, habang tinuligsa rin nito ang malinaw na “double standard” sa sistema ng hustisya sa bansa na pumapabor sa mga mayayaman at makapangyarihang personalidad habang pinababayaan ang mga aktibista sa kulungan.
Ginawa ni Tinio ang pahayag bilang suporta sa petisyon para sa writ of habeas corpus na isinampa sa Korte Suprema ni Fides Lim, maybahay ng 77-anyos na bilanggong pulitikal na si Vicente Ladlad. Si Ladlad ay halos walong taon nang nakakulong dahil sa mga gawa-gawang kaso ng illegal possession of firearms and explosives.
“The starkness of the double standard in the Philippine justice system is so brazen. When a former senator like Bong Revilla is allowed bail, the system bends over backwards to accommodate him. But when an elderly, sick activist like Vic Ladlad seeks the same humanitarian consideration, the system turns a blind eye,” ani Tinio.
Kasama ang mga abogado mula sa Free Legal Assistance Group (FLAG), inihain ni Lim ang petisyon upang hilingin sa Korte Suprema na iutos ang agarang pagpapalaya kay Ladlad batay sa humanitarian grounds.
Batay sa petisyon, si Ladlad, na peace consultant ng National Democratic Front of the Philippines, ay nakararanas na ng iba’t ibang karamdaman tulad ng asthma-COPD overlap syndrome, pneumonia, tuberculosis at malalang pagkawala ng pandinig.
Ibinahagi rin ng abogado ng FLAG na si Michael de Castro ang kaparehong punto.
“If this was allowed for Gigi Reyes, if this was allowed for Juan Ponce Enrile, why can’t it be allowed for people like us? Why can’t it be allowed for Vic Ladlad?” giit nito.
Matatandaang pinayagang magpiyansa si Enrile ng Korte Suprema noong 2015, noong siya ay 91-anyos na, habang si Gigi Reyes naman ay binigyan ng writ of habeas corpus noong 2023 matapos ideklara ng mataas na hukuman na “vexatious, capricious and oppressive” ang siyam na taong pagkakakulong nito.
Iginiit ni Tinio na si Ladlad ay nasa kaparehong sitwasyon at walang dahilan upang hindi magdesisyon ang Korte Suprema pabor sa kanya, lalo pa’t hindi siya flight risk.
“The Supreme Court itself has acknowledged that vexatious, capricious, and oppressive detention warrants release. Vic Ladlad has been detained for nearly eight years, with delays attributable to the prosecution, judges and prosecutors on leave, failure to bring evidence to court, COVID-19 quarantine cancellations. If that is not vexatious and oppressive, what is?” pahayag ni Tinio.
Nagbabala rin ang mambabatas na ang patuloy na pagkakulong kay Ladlad nang walang sapat na atensyong medikal ay maituturing na parang death sentence.
“His wife fears bringing him home in a coffin. To insist on his continued detention without bail is a de facto death sentence. How many more elderly political prisoners must suffer the same fate before this government acts?” pagtatapos pa ni Tinio. Gail Mendoza
