MANILA, Philippines – Nananatiling kabilang sa pinakamataas sa Southeast Asia ang presyo ng kuryente sa Pilipinas, na nagpapabigat sa gastusin ng mga pamilya at nagpapahina sa kakayahan ng mga lokal na negosyo na makipagkumpitensya, ayon sa pinakabagong Philippine Economic Update ng World Bank.
Sinabi ng Washington-based multilateral lender na umaabot sa average na $0.21 kada kilowatt-hour ang residential electricity rate sa bansa, mas mataas kaysa $0.13 sa Thailand, $0.09 sa Indonesia at $0.05 sa Malaysia, ngunit bahagyang mas mababa sa $0.23 ng Singapore.
“Business rates show a similar pattern, putting the Philippines at a disadvantage relative to most regional competitors,” ayon sa World Bank.
Una nang kinilala ng Department of Energy na ang Pilipinas ang may pinakamahal na singil sa kuryente sa mga bansa sa ASEAN.
Ayon sa World Bank, ang mataas na presyo ng kuryente ay “affects households directly through electricity bills and indirectly through the cost of food, transport, and services.”
Kahit isaalang-alang ang mga subsidy na ibinibigay sa ibang bansa, mas mataas pa rin nang humigit-kumulang 57 porsiyento ang residential electricity rates sa Pilipinas kumpara sa Malaysia at 17 porsiyento kumpara sa Indonesia.
Sinabi ng lender na ipinapakita ng agwat sa presyo na hindi umaasa nang malaki ang Pilipinas sa state energy subsidies at sa halip ay gumagamit ng transparent cost recovery na nakatutulong sa fiscal sustainability. Gayunman, inilalantad din nito ang mga structural inefficiency sa sistema ng kuryente.
Tinukoy sa ulat ang mataas na generation costs, mga lumang supply arrangement at transmission bottlenecks bilang pangunahing dahilan ng mahal na kuryente.
Humigit-kumulang dalawang-katlo ng singil sa konsumer ang mula sa generation costs, habang nasa 70 porsiyento ng electricity purchases ang sakop ng Power Supply Agreements.
Ayon sa World Bank, ang fixed capacity payments, take-or-pay clauses at automatic fuel pass-through provisions sa mga long-term contract ang dahilan kung bakit hindi agad naipapasa sa mga konsumer ang pagbaba ng generation costs.
Nagpapataas din sa presyo ang mamahaling emergency power purchases tuwing may kakulangan sa supply at limitadong kompetisyon sa power generation at contracting.
Nagbabala ang World Bank na nakapag-ambag ang mataas na singil sa kuryente sa paghina ng tradable sectors at sa limitadong paglawak ng bansa sa mga industriyang may mas mataas na productivity, na nakaaapekto sa exports, paglago ng ekonomiya at paglikha ng mas mataas na sahod na trabaho.
“Research indicates that they have contributed to the relative decline of tradable sectors and limited the country’s ability to expand higher-productivity activities. This affects export diversification, productivity growth, and better-paying jobs. Improving the affordability and reliability of electricity is therefore important not only for the power sector, but also for growth, job creation, and the Philippines’ transition toward a stronger middle-class economy,” ayon sa World Bank.
Sinabi ng lender na makatutulong ang maagap at pinakamurang pagpapatupad ng renewable energy projects, pagpapalawak ng power grid, pagpapahusay ng system flexibility at pagpapatatag ng kompetisyon upang mapababa ang presyo ng kuryente at mabawasan ang pagdepende sa imported fuel.
“The analysis shows that timely least-cost implementation of renewable energy, grid expansion, system flexibility, and strengthened competition could deliver a lower-cost, more reliable, and less fuel-dependent power system than a delayed implementation pathway. Lower electricity costs would in turn raise GDP growth, strengthen manufacturing competitiveness, create jobs, and reduce poverty and inequality,” ayon sa World Bank. RNT
