MANILA, Philippines — Nanawagan si Chairman Emeritus Dr. Jose Antonio Goitia na imbestigahan ang mga naiulat na kabaong na natagpuan sa iba’t ibang bahagi ng Metro Manila, kasabay ng panawagan na huwag umabot sa puntong malihis ang usapin mula sa mas malaking isyu ng soberanya at pambansang seguridad.
Ayon kay Goitia, mahalagang matukoy kung sino ang naglagay ng mga kabaong, kung magkakaugnay ang mga insidente at kung may nilabag na batas o ordinansa.
“Imbestigahan kung sino ang naglagay ng mga kabaong. Alamin ang mga katotohanan. Panagutin ang sinumang lumabag sa batas,” ani Goitia.
Gayunman, iginiit niyang kailangang paghiwalayin ang usapin sa pagkakakilanlan ng mga nasa likod ng mga ipinaskil na mensahe at ang sentimyentong nais nitong iparating.
Hindi pa umano malinaw kung sino ang nasa likod ng mga kabaong, ngunit sinabi ni Goitia na hindi maikakaila ang pangamba ng ilang Pilipino kaugnay sa China, partikular sa usapin ng soberanya, karapatang teritoryal at seguridad ng bansa.
Aniya, hindi naman lumitaw nang walang dahilan ang ganitong pangamba dahil sa mga nagdaang tensiyon sa West Philippine Sea.
Kabilang dito ang mga ulat hinggil sa pangha-harass sa mga Pilipinong mangingisda at mga insidenteng kinasasangkutan ng mga sasakyang pandagat ng Pilipinas at China.
“Hindi nangangailangan ng pagiging padalos-dalos ang pagiging makabayan,” ani Goitia. “Ngunit hindi rin nangangahulugan ang pagiging responsableng mamamayan na kailangan nating manahimik habang hinahamon ang ating soberanya.”
Kasabay nito, nagbabala si Goitia laban sa pagbibintang nang walang sapat na ebidensya at sa pagpapakalat ng mga alegasyon tungkol sa umano’y organisasyong nasa likod ng mga kabaong.
“Kung lumabag sa batas ang mga responsable, kasuhan sila. Kung mapatutunayang may organisasyong nasa likod nito, ilabas ang ebidensya,” aniya.
Binigyang-diin niyang mahalaga ang ebidensya at pagsunod sa batas, ngunit hindi rin dapat maisantabi ang usapin ng soberanya.
“Hangga’t wala iyon, huwag tayong mag-imbento ng organisasyon at huwag ding mag-imbento ng sabwatan,” dagdag niya.
Para kay Goitia, maaaring kontrobersyal at mapangahas ang simbolismong ginamit sa mga kabaong at dapat itong imbestigahan upang matukoy kung sino at bakit inilagay ang mga ito.
Ngunit iginiit niyang may karapatan ang mga Pilipino na magpahayag ng kanilang saloobin, kuwestiyunin ang impluwensiya ng dayuhan at manindigan sa mga usaping itinuturing nilang may direktang epekto sa soberanya ng bansa.
“Alamin kung sino ang naglagay ng mga kabaong at kung bakit. Itatag ang katotohanan,” ani Goitia.
Gayunman, sinabi niyang hindi dapat matapos sa pagkilala sa mga responsable ang diskusyon.
Sa halip, dapat umabot ang usapin sa mas malalim na tanong kung paano mapangangalagaan ng bansa ang sariling soberanya at pambansang interes.
Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield Movement (FDNY). Nagtapos siya ng Juris Doctor at Doctor of Philosophy (PhD) at may mga advanced degree sa MNSA, MPA at MBA. RNT
