MANILA, Philippines – Ipinag-utos ng Office of the Ombudsman ang anim na buwang preventive suspension without pay kina Land Transportation Franchising and Regulatory Board (LTFRB) Chairman Vigor Mendoza II at Office of Transportation Cooperatives (OTC) Chairman Teofilo Guadiz III kaugnay ng patuloy na paggamit ng lumang information technology system ng Land Transportation Office (LTO).
Kapwa dating LTO chief sina Mendoza at Guadiz. Nahaharap sila sa administrative charges ng grave misconduct at conduct prejudicial to the best interest of the service.
Nakatuon ang kaso sa patuloy na paggamit ng IT system na pinatatakbo ng STRADCOM kasabay ng mas bagong Land Transportation Management System (LTMS), na itinakdang pumalit sa lumang platform.
Ayon sa Ombudsman, na-flag ng Commission on Audit ang parallel operation ng dalawang sistema, na nagresulta umano sa P13.38 bilyong computer fees na siningil sa mga motorista mula 2019 hanggang 2025.
“The continued utilization of the LTO IT System by Guadiz and Mendoza demonstrates a patent disregard of established government policy and prior official directives intended to transition LTO operations to the LTMS,” ayon sa ruling.
Sinabi rin ng Ombudsman na may sapat na batayan para ipataw ang preventive suspension habang dinidinig ang administrative case. Agad na epektibo ang kautusan at maaaring manatili ang suspensyon nang anim na buwan o habang nakabinbin ang kaso.
Ang preventive suspension ay hindi pa pinal na paghatol sa pananagutan nina Mendoza at Guadiz habang nagpapatuloy ang proceedings sa Ombudsman. Santi Celario
