RIZAL, Philippines – Sinabi ng Department of Environment and Natural Resources (DENR) na ang Pamitinan Protected Landscape (PPL) sa Montalban, Rizal ay nananatiling pansamantalang sarado sa mga bisita habang nagsasagawa ang mga awtoridad ng paglilinis, pagkukumpuni, at pagsusuri sa kaligtasan.
Nabatid sa DENR na ang lugar na ito ay isang tanyag na destinasyon para sa mga rock climber at mga mahilig sa mga aktibidad sa labas (outdoor enthusiasts).
Magugunitang isinara ang lugar matapos matuklasan ang mga bitak sa tuktok nito.
Inanunsyo ng Department of Environment and Natural Resources (DENR) sa Calabarzon ang pagpapatuloy ng pagsasara noong Sabado (Agosto 22).
“Dahil ang PPL ay isang lugar na madaling magkaroon ng pagguho ng bato (rockslide), kasalukuyang isinasagawa ang karagdagang pagsusuri at pagpapatupad ng mga kinakailangang hakbang pangkaligtasan upang matiyak ang kaligtasan ng mga bisita, tour guide, at mga kawani,” paliwanag ng DENR.
Kaugnay nito sinabi ng DENR na ipapaalam sa publiko kapag idineklara nang ligtas ang lugar at handa na itong buksan muli.
Nabatid na sakop ng 608-ektaryang protected landscape ang Montalban Gorge, Wawa Dam, Upper Marikina River, Mount Pamitinan, Mount Binacayan, at Pamitinan Cave.
Ang Mount Pamitinan ay paboritong destinasyon para sa rock climbing dahil sa mga matutulis at magaspang na pormasyon ng limestone at sa magagandang tanawin mula sa tuktok nito.
Sinabi pa ng DENR na ang Wawa Dam ay isa ring tanyag na lugar para sa paglangoy at piknik, habang ang Pamitinan Cave naman ay kilala sa kaugnayan nito sa kasaysayan ng Katipunan.
Ayon sa mga tala ng kasaysayan, ginamit nina Andres Bonifacio at ng iba pang mga Katipunero ang kuweba bilang taguan, habang iniuugnay naman ito ng mga lokal na kuwento sa maalamat na tauhan na si Bernardo Carpio. (Santi Celario)
