ZAMBALES — Anim na miyembro ng Aeta community, kabilang ang tatlong bata, ang nasawi habang tatlo pa ang nawawala matapos tumaob ang sinasakyan nilang motorized banca sa Mapanuepe Lake sa Barangay Buhawen, San Marcelino, Zambales nitong Huwebes, Agosto 27.
Ayon sa mga paunang ulat, 13 katao ang sakay ng bangka nang mangyari ang insidente dakong alas-4:40 ng hapon habang pauwi ang grupo patungong Sitio Lomibao. Apat ang nakaligtas, anim ang nasawi at tatlo ang patuloy na hinahanap.
Kabilang sa mga nawawala ang dalawang bata, edad lima at 12, at isang buntis na babae, ayon sa initial situation report. Patuloy ang search and rescue operations sa lawa.
Ayon naman kay Liza Balario, Indigenous Peoples Mandatory Representative ng Barangay Buhawen, sa panayam ng Inquirer, mula sa Aeta community sa Sitio Lomibao ang mga biktima. Kinakailangan umano nilang tumawid ng lawa upang makarating sa barangay proper kung saan naroon ang health center.
Sinabi ni Balario na pauwi na ang grupo matapos kumuha ng gamot at pagkain nang lumakas umano ang hangin habang nasa gitna sila ng lawa.
Gayunman, may hiwalay na initial situation report na nagsasabing posibleng overloading ang dahilan ng pagtaob ng bangka. Hindi pa malinaw sa mga available na opisyal na impormasyon ang pinal na sanhi ng insidente.
Kinumpirma sa opisyal na website ng San Marcelino na si Arsenio Edar Mauricio III ang hepe ng Municipal Disaster Risk Reduction and Management Office (MDRRMO), na nangunguna sa disaster response operations ng bayan.
Nagpapatuloy ang operasyon upang mahanap ang tatlong nawawala at matukoy ang buong detalye ng insidente. Mary Anne Sapico
