Mag-asawa, 4-anyos na apo pinaulanan ng bala sa Cavite; 2 arestado

CAVITE — Hawak na ng pulisya ang dalawang pangunahing suspek sa pagpatay sa mag-asawang senior citizen at kanilang apat na taong gulang na apo na pinagbabaril sa loob ng kanilang tahanan sa Indang, Cavite.

Batay sa ulat ng Cavite Police Provincial Office (CPPO), nangyari ang pamamaril noong gabi ng Agosto 25. Isang saksi umano ang nakakita sa dalawang lalaki na pumasok sa bahay bago nakarinig ng sunod-sunod na putok ng baril.

Limang tama ng bala ang tinamo ng 63-anyos na lolo, tatlo naman ang tinamo ng kanyang 62-anyos na asawa, habang dalawang tama ng bala ang tumama sa kanilang apat na taong gulang na apo.

Narekober ng mga imbestigador sa crime scene ang siyam na basyo at apat na deformed bullets na pinaniniwalaang mula sa caliber .45 na baril.

Naaresto ang unang suspek sa Indang dakong alas-1:45 ng madaling araw noong Agosto 26, habang sumuko naman sa mga awtoridad sa Trece Martires City ang ikalawang suspek dakong ala-1 ng madaling araw nitong Agosto 27.

Lumabas sa paunang imbestigasyon na nagkaroon umano ng mainitang alitan ang mga suspek at dalawa sa mga biktima bago ang pamamaril.

Gayunman, sinabi ng pulisya na patuloy pa nilang tinutukoy ang eksaktong motibo sa krimen.

Desidido naman ang pamilya ng mga biktima na magsampa ng kaso laban sa mga suspek.

Nananatili sa kustodiya ng mga awtoridad ang dalawang lalaki habang nagpapatuloy ang imbestigasyon at paghahanda ng kaukulang kaso. Mary Anne Sapico