MANILA, Philippines — Nagpatupad ng malawakang reshuffle ang Philippine National Police (PNP), kabilang ang pagpapalit ng mga regional police director at paglilipat ng ilang heneral sa mahahalagang posisyon sa Camp Crame.
Batay sa magkahiwalay na PNP reassignment orders na may petsang Agosto 26, itinalaga si Brig. Gen. Randy Glenn Silvio bilang bagong director ng Police Regional Office 5 (Bicol), habang si Brig. Gen. Nestor Babagay Jr. ang bagong mamumuno sa PRO-10 (Northern Mindanao). Epektibo ang kanilang pagkakatalaga nitong Agosto 27.
Samantala, siyam pang police generals ang may bagong assignment epektibo ngayong Biyernes, Agosto 28.
Itinalaga si Brig. Gen. Crisaleo Tolentino, dating Maritime Group director, bilang bagong hepe ng PRO-1 o Ilocos Region, kapalit ni Brig. Gen. Jovencio Baduja Jr., na inilipat sa Directorate for Police Community Relations.
Mula naman sa PNP Drug Enforcement Group, inilipat si Brig. Gen. Elmer Ragay upang pamunuan ang PRO-9 o Zamboanga Peninsula, habang si Brig. Gen. Rolindo Suguilon ay itinalaga bilang director ng PRO-Caraga.
Si Brig. Gen. Noel Vallo naman ang bagong director ng PRO-Cordillera Administrative Region, kapalit ni Brig. Gen. Ericson Dilag, na inilipat sa Directorate for Information and Communications Technology Management.
Inilipat din si dating PRO-Caraga director Brig. Gen. Marcial Mariano Magistrado IV sa Directorate for Comptrollership.
Samantala, si Brig. Gen. Jaime Cadatal ay inilipat mula Directorate for Comptrollership patungong Logistics Support Service, habang si Brig. Gen. Dennis Esguerra, dating PRO-9 director, ay itinalaga sa Directorate for Investigation and Detective Management.
Ang mga reassignment ay bahagi ng mga personnel movement na iniutos sa ilalim ng pamumuno ni PNP chief Gen. Jose Melencio Nartatez Jr. Santi Celario
