TARLAC, Philippines – Bumagsak ang ikalawang tulay sa Tarlac City sa loob lamang ng isang araw dahil sa tuloy-tuloy na malalakas na ulan dulot ng Habagat.
Ayon sa Tarlac City Disaster Risk Reduction and Management Office, bumagsak ang Agana Bridge sa Barangay Tibag bandang 8:32 p.m. noong Agosto 29.
Isang araw bago nito, bumigay din ang bahagi ng Aquino Bridge dahil sa tuloy-tuloy na ulan at malalakas na agos ng ilog, kaya isinara ito sa trapiko.
Isang kulay abong Toyota Avanza na may limang sakay—tatlong lalaki at dalawang babae—ang nahulog sa Tarlac River nang bumagsak ang Agana Bridge. Isang pasahero ang nailigtas at dinala sa Tarlac Provincial Hospital para sa pagsusuri, habang nagpapatuloy ang paghahanap sa apat pang nawawala.
Ayon sa pamahalaang lungsod, nasira at isinara ang Agana Bridge dahil sa tuloy-tuloy na ulan at malakas na agos ng tubig sa Tarlac River. Patuloy ang search and rescue operations upang hanapin ang iba pang posibleng biktima at matukoy ang buong lawak ng insidente.
Pinayuhan ang mga motorista at residente na huwag tumawid o dumaan sa nasirang tulay, gumamit ng mga alternatibong ruta, at sundin ang mga abiso ng mga awtoridad.
Iniimbestigahan pa ang sanhi ng pagguho at lawak ng pinsala. Pinananatili ring nakaalerto ang mga emergency response team, habang hinimok ang mga residente, lalo na sa mga mabababang lugar, na manatiling mapagmatyag dahil patuloy ang mga pag-ulan sa ilang bahagi ng Tarlac. RNT/MDS
