MANILA, Philippines – Siniguro ng Department of Health (DOH) sa publiko na may sapat na gamot sa leptospirosis sa kabila ng pagsirit ng mga kaso ng sakit dahil sa malalakas na pag-ulan at pagbaha dala ng Habagat.
Sa House budget hearing, sinabi ni DOH Secretary Edwin Mercado na naipamahagi na ng ahensya ang mga gamot sa leptospirosis sa buong bansa bago pa ang pagsisimula ng tag-ulan.
“Meron po tayong download na preemptively even before the start of the rainy season, and then we have at least 3.1 million capsules still in the central warehouse, which is enough buffer for the rest of the year,” ani Mercado.
Para sa taong 2027, ang DOH ay naglaan ng P9.76 milyon para bumili ng 4.88 milyong kapsula ng gamot para gamutin ang leptospirosis.
“For 2027, we have P9.76 million [and] we will procure 4.88m capsules, so we are prepositioning across the CHD (Center for Health Development) earlier. Again, this will be part of our early procurement,” sinabi ni Mercado.
Sa kasalukuyan ay mayroong 526 admissions at 33 pending admissions ng leptospirosis patients sa mga DOH hospital sa Metro Manila.
Nauna nang hinimok ng DOH ang publiko na agad magpakonsulta sa doktor sa halip na maghintay ng sintomas ng leptospirosis bago magpagamot. RNT/JGC
