MANILA, Philippines – May ilang senator-judges na nais muling pag-aralan ang kinakailangang 16 boto para ma-convict si Vice President Sara Duterte sa kanyang impeachment trial dahil sa kawalan ng ilang miyembro ng Senado, ayon kay Senate Majority Leader Juan Miguel Zubiri.
Sinabi ni Zubiri nitong Huwebes na may mga senador nang nagtatanong kung dapat manatili ang kasalukuyang voting threshold, lalo na’t may mga senador na nakakulong at may hindi rin nakadadalo sa paglilitis.
Noong Hulyo 6, nagpasya si impeachment court presiding officer Sen. Francis “Chiz” Escudero na kailangan ang 16 affirmative votes upang mahatulang guilty si Duterte. Batay ito sa probisyon ng Konstitusyon na nagsasabing walang maaaring ma-convict sa impeachment nang walang pagsang-ayon ng dalawang-katlo ng lahat ng miyembro ng Senado.
May 24 na miyembro ang Senado, kaya 16 boto ang katumbas ng two-thirds threshold.
Sinabi ni Zubiri na maaaring talakayin muli ang usapin sa impeachment court at humingi ng panibagong ruling mula sa presiding officer.
“There are some questions with some senators on the threshold. So that issue has to be answered soon enough by the presiding officer,” ani Zubiri.
Kabilang sa mga hindi regular na nakadadalo sa paglilitis sina Sens. Jinggoy Estrada at Rodante Marcoleta na nakakulong kaugnay ng magkahiwalay na plunder cases, habang hindi rin nakadadalo si Sen. Ronald “Bato” dela Rosa na may warrant of arrest mula sa International Criminal Court. Ilang linggo na ring hindi nakadadalo si Sen. Loren Legarda dahil sa kondisyon sa kalusugan.
Gayunman, may mga legal expert na naninindigang hindi awtomatikong nababago ng detention o kawalan ng ilang senador ang constitutional threshold. Nauna nang sinabi ni retired Supreme Court Associate Justice Adolfo Azcuna na maaaring maapektuhan ang quorum, ngunit hindi ang dalawang-katlong boto ng lahat ng miyembro ng Senado na kailangan para sa conviction.
Sa ngayon, nananatiling umiiral ang ruling na 16 boto ang kailangan para ma-convict si Duterte maliban kung baguhin ito ng impeachment court o magkaroon ng kaukulang judicial ruling. RNT
