MANILA, Philippines — Pinaiimbestigahan ni Negros Occidental 3rd District Rep. Javier Miguel Benitez ang sinisingil sa mga consumer sa Visayas para sa ancillary services o reserbang kuryente, sa gitna ng paulit-ulit na red alert sa power grid ng rehiyon.
Sa House Resolution No. 1430, hiniling ni Benitez sa House Committee on Energy na busisiin ang pagtaas ng nationwide ancillary services rate mula P0.7941 sa P1.0391 kada kilowatt-hour para sa July 2026 billing period, o 30.85 porsiyentong dagdag na ipinasa sa consumers sa kanilang August bills.
Partikular niyang hinihingi ang disclosure ng aktuwal na ancillary services charges sa Visayas at buwanang galaw nito mula Enero hanggang Agosto 2026.
Ayon sa resolusyon, kasabay ng paniningil ng reserve charges ay nakaranas ang Visayas Grid ng ilang red alert dahil sa malalaking forced outages at deratings ng power plants.
Noong Hulyo 8, umabot umano sa 1,092.8 megawatts ang unavailable capacity, na nagresulta sa manual load dropping sa ilang bahagi ng Cebu, Mactan, Aklan, Antique, Bohol, Capiz, Guimaras at Iloilo.
Sa panibagong red alert noong Agosto 26, nasa 938.9 MW naman ang unavailable capacity.
Nais ni Benitez na ipaliwanag ng National Grid Corporation of the Philippines, Energy Regulatory Commission, Department of Energy, Independent Electricity Market Operator of the Philippines at mga power at ancillary service providers kung magkano ang siningil sa consumers at kung ang mga binayarang reserve capacity ay aktuwal na available at na-deliver noong mga panahong nagkaroon ng red alert.
Pinabubusisi rin niya kung may dapat ipataw na penalties o refunds sakaling mapatunayang hindi naibigay ang reserve capacity na binayaran ng mga consumer.
“Every centavo of this charge is passed on to the consumer, so every centavo has to be accounted for,” ani Benitez.
Kasama rin sa hinihinging imbestigasyon ang status at target completion dates ng mga power generation, energy storage at transmission projects sa Visayas, kabilang ang pagpapalakas sa Cebu-Negros-Panay backbone at deployment ng battery storage systems.
Nais din ng mambabatas na matukoy ang dahilan ng anumang project delays at ang lawak at sanhi ng umano’y curtailment sa produksyon ng mga solar power plant sa Negros ngayong 2026. RNT
