PASAY CITY, Philippines – Pinangunahan nina Senate Foreign Relations Committee Chairperson Sen. Juan Miguel “Migz” Zubiri, Sen. Erwin Tulfo at Defense Secretary Gilberto Teodoro ang pagdinig ng Senado sa panukalang Philippines-France Status of Visiting Forces Agreement (PH-France SOVFA) nitong Huwebes, Setyembre 10, 2026.
Layunin ng kasunduan na magtakda ng legal na balangkas para sa pagpasok at pananatili ng mga sundalong Pilipino at French military personnel sa teritoryo ng isa’t isa para sa joint training, military exercises at iba pang aktibidad sa depensa.
Nilagdaan nina Teodoro at French Armed Forces Minister Catherine Vautrin ang SOVFA sa Paris noong Marso 26, 2026. Ito ang unang ganitong defense pact ng Pilipinas sa isang bansang Europeo.
Ayon sa Department of National Defense, makatutulong ang kasunduan sa pagpapalakas ng interoperability ng dalawang hukbo at sa kooperasyon sa maritime security, maritime domain awareness, humanitarian assistance at disaster response.
Mahalaga rin ang pagpayag ng Senado dahil kailangang makuha ng mga international agreement ang concurrence ng hindi bababa sa dalawang-katlo ng mga senador bago ito tuluyang magkabisa bilang tratado.
Kapag niratipika, madaragdag ang France sa mga bansang may katulad na visiting forces arrangement sa Pilipinas, kasunod ng Estados Unidos, Australia, Japan, Canada at New Zealand. Nitong Agosto, inaprubahan na rin ng Senado sa botong 19-0-0 ang SOVFA ng Pilipinas sa Canada at New Zealand.
Ang pagdinig sa PH-France SOVFA ay bahagi ng patuloy na pagpapalawak ng defense cooperation ng Pilipinas sa mga kaalyado at strategic partners, lalo na sa harap ng mga hamon sa seguridad sa Indo-Pacific. RNT/MDS/larawan kuha ni Cesar Morales
