MANILA, Philippines – Nasungkit ng Baguio City ang Gold Award sa ikalawang ASEAN Smoke-Free Awards na ginanap sa Kuala Lumpur, Malaysia nitong Huwebes, Setyembre 10.
Kinilala ang lungsod dahil sa pagpapatupad at mahigpit na pagpapatupad ng mga polisiya laban sa paninigarilyo upang maprotektahan ang kalusugan ng publiko.
Tumanggap naman ng Bronze Award ang Pasig City kasama ang iba pang local governments mula Indonesia, Malaysia, Myanmar at Thailand.
Nakuha ng George Town sa Penang, Malaysia ang Silver Award habang binigyan naman ng Special Recognition ang Singapore para sa tuloy-tuloy na pagpapatupad ng smoke-free policies.
Pinangunahan ang parangal ng Lao PDR sa ilalim ng ASEAN Health Cluster 1 katuwang ang Southeast Asia Tobacco Control Alliance (SEATCA) at ASEAN Secretariat.
Pinuri naman ng HealthJustice Philippines ang Baguio at Pasig dahil sa pagpapatupad ng smoke-free at vape-free ordinances.
Ayon kay dating Health Secretary at HealthJustice board member Jaime Galvez Tan, ipinakita ng dalawang lungsod na maaaring maisulong sa lokal na antas ang mga hakbang na nagpoprotekta sa publiko laban sa tobacco at vape exposure.
Isinagawa ang awarding kasabay ng pagbubukas ng ASEAN Health Ministers Meeting sa Kuala Lumpur.
Noong 2024, Iloilo City ang kauna-unahang nakatanggap ng Gold Award sa inaugural ASEAN Smoke-Free Awards. Mary Anne Sapico
