MANILA, Philippines — Nilinaw ng Philippine General Hospital (PGH) nitong Lunes na hindi naka-confine sa tinatawag na “presidential suite” si Leyte Rep. at dating House Speaker Martin Romualdez.
Ayon kay PGH spokesperson Dr. Jonas del Rosario, walang ganoong accommodation sa ospital at hindi rin naka-admit si Romualdez sa psychiatry ward.
“He is not confined in a presidential suite. Wala po kaming ganoon,” ani Del Rosario sa GMA News.
Paliwanag ng PGH, napili ang kuwartong ginagamit ni Romualdez dahil madali itong ma-secure, hindi makaaabala sa daloy ng serbisyo sa ospital, sapat ang laki para sa kinakailangang medical equipment at personnel, at ito na lamang ang natitirang malaking private room nang matanggap ang court order.
Dinala si Romualdez sa PGH mula Cardinal Santos Medical Center noong Sabado para sa independent medical assessment na iniutos ng Sandiganbayan Third Division.
Inatasan ang PGH na tukuyin kung kailangan pa niyang manatili sa medical confinement. Kung hindi, maaari siyang ilipat sa detention facility alinsunod sa magiging kautusan ng korte.
Nakatakdang humarap sa Sandiganbayan ang PGH director upang ihayag ang resulta ng medical assessment kay Romualdez. RNT
