MANILA, Philippines — Hiniling ng prosecution ng International Criminal Court (ICC) sa Trial Chamber III na ideklarang fit for trial si dating Pangulong Rodrigo Duterte kaugnay ng kinakaharap niyang crimes against humanity case.
Sa pagsusumiteng may petsang Setyembre 14, sinabi ni acting ICC Prosecutor Mame Mandiaye Niang na kayang makabuluhang gamitin ni Duterte ang kanyang procedural at trial rights batay sa pagsusuri ng court-appointed medical experts.
Sumailalim ang dating Pangulo sa panibagong medical examination matapos iutos ng Trial Chamber III noong Hunyo ang independent assessment sa kanyang fitness to stand trial.
Iginiit din ng prosecution na hindi kinakailangan ang hiwalay na hearing upang resolbahin ang usapin sa fitness ni Duterte, bagama’t malaking bahagi ng detalye ng medical assessment at rekomendasyon ng experts ay naka-redact sa public filing.
Ayon sa prosecution, sinuri ng mga eksperto ang mga kaugnay na medical records at nakapanayam din, kung kinakailangan, ang clinicians at detention staff na may kaalaman sa kondisyon ni Duterte.
Gayunman, wala pang pinal na desisyon ang Trial Chamber III kung ideklarang fit for trial ang dating Pangulo.
Nakatakdang magsimula sa Nobyembre 30, 2026 ang paglilitis kay Duterte, matapos kumpirmahin ng ICC Pre-Trial Chamber noong Abril ang tatlong counts ng crimes against humanity laban sa kanya.
Patuloy na itinatanggi ng kampo ni Duterte ang mga paratang laban sa dating Pangulo. Dave Medina
