MANILA, Philippines — Umabot sa mahigit 151,000 local at overseas job vacancies ang inalok sa nationwide job fairs na isinagawa ng Department of Labor and Employment (DOLE).
Pinangunahan ni Labor Secretary Francis Tolentino ang pagbubukas ng TRABAHO AGAD program sa Pasig City, kung saan 1,426 local at overseas employers ang lumahok sa 86 job fair sites sa 73 lalawigan.
Pinakamaraming bakanteng trabaho ang mula sa business process outsourcing (BPO) sector, kabilang ang mahigit 8,400 customer service representative positions, kasunod ang manufacturing, retail, construction, transportation at logistics.
Kasabay ng job fairs, umabot naman sa ₱2.83 bilyon ang halaga ng mga serbisyo at tulong na inilaan ng pamahalaan sa buong bansa sa ilalim ng Handog ng Pangulo program.
Sa Pasig City, mahigit ₱18 milyon ang inilaan para sa mga benepisyaryo ng mga programang tulad ng Tulong Panghanapbuhay sa Ating Disadvantaged/Displaced Workers (TUPAD) at DOLE Integrated Livelihood Program.
Palalakasin din ng DOLE ang artificial intelligence upskilling program para sa 10,000 BPO workers sa pamamagitan ng Technical Education and Skills Development Authority (TESDA), bilang bahagi ng paghahanda sa mga manggagawa sa pagbabago ng trabaho dulot ng AI. Jocelyn Tabangcura-Domenden
