MANILA, Philippines – Pansamantalang sinuspinde simula Biyernes, Setyembre 18, ang P12 kada litro na fuel discount para sa public utility jeepneys (PUJ) at UV Express units dahil sa election ban para sa Barangay at Sangguniang Kabataan Elections (BSKE).
Ayon sa Land Transportation Franchising and Regulatory Board (LTFRB), hinihintay ang approval ng Commission on Elections (Comelec) bago ipagpatuloy ang pagbibigay ng fuel discount.
Nagsimula noong Biyernes ang election ban para sa BSKE at tatagal hanggang Nobyembre 1. Ipinagbabawal nito ang pag-release, pag-disburse o paggastos ng public funds para sa social welfare at social services, maliban sa mga programang awtorisado ng Comelec.
“The temporary suspension is being implemented pending the appropriate action and approval from the Commission on Elections (Comelec) for the resumption of disbursement,” ayon sa LTFRB.
Samantala, in-adopt ng Kamara noong Setyembre 16 ang Senate Bill No. 2397 na naglalayong gawing limang taon ang termino ng barangay at SK officials.
Kapag nilagdaan bilang batas, maaantala ang BSKE na nakatakda sanang Nobyembre 2 at ililipat sa ikalawang Lunes ng Nobyembre 2028. RNT/MDS
