3-day transport strike umarangkada, kasabay taas-pasahe sa PUV

MANILA, Philippines — Sinimulan ng transport group na Manibela nitong Lunes, Setyembre 28, ang tatlong araw na transport strike kasabay ng pagpapatupad ng bagong taas-pasahe sa mga public utility vehicle (PUV).

Nagtipon ang mga miyembro ng Manibela, kasama ang ilang TNVS at UV Express drivers, motorcycle taxi riders at truckers sa University Avenue sa Quezon City bago nagsagawa ng caravan patungong Philcoa.

Ayon kay Manibela chairperson Mar Valbuena, tinatayang 20,000 hanggang 25,000 jeepney drivers sa iba’t ibang ruta sa Metro Manila ang inaasahang lalahok sa strike.

Kabilang sa kanilang panawagan ang pagbaba ng presyo ng langis, mas mataas na dagdag-pasahe at pagtanggal ng excise tax at value-added tax sa petroleum products.

Samantala, epektibo na rin ngayong Lunes ang provisional fare increase na inaprubahan para sa mga PUV.

Mula P13 ay naging P14 ang minimum fare sa traditional jeepney para sa unang apat na kilometro, habang P17 na mula P15 ang minimum fare sa modern jeepney. Tataas din ang pamasahe sa city at provincial buses, UV Express, taxi, TNVS at point-to-point buses.

Paalala naman sa mga operator at driver, kailangang nakapaskil sa kanilang sasakyan ang opisyal na fare matrix bago maningil ng bagong pamasahe.

Tatagal hanggang Setyembre 30 ang protesta ng Manibela, habang nakatakda namang magsagawa ng dalawang araw na transport strike ang PISTON sa Setyembre 29 at 30.

Nauna nang nagbabala ang Land Transportation Franchising and Regulatory Board (LTFRB) na maaaring patawan ng show-cause order at multa ang mga operator na lalabag sa kondisyon ng kanilang prangkisa kaugnay ng tuloy-tuloy na pagbibigay ng serbisyo. Santi Celario