MANILA, Philippines – Pinalawak ng Department of Labor and Employment (DOLE) ang TUPAD program sa ilalim ng Administrative Order No. 339, s. 2026 na nilagdaan ni Sec. Francis Tolentino, mula sa panandaliang emergency work tungo sa pangmatagalang trabaho, negosyo at mas mataas na kita para sa disadvantaged workers.
Sa ilalim ng programa, iuugnay ang mga kwalipikadong benepisyaryo sa job placement, certified skills, micro-business funding, edukasyon at blue economy opportunities sa pamamagitan ng pitong flagship innovations: SkillPass, Tropa Negosyo Trabaho, Sagip-Trabaho, KaHanap, Match Fund LGU, Tulong-Aral, at Trabahong-Dagat.
Target ng pinalawak na TUPAD ang first-time jobseekers at kabataan, displaced at underemployed workers, informal sector, mga naapektuhan ng kalamidad at pagsasara ng negosyo, pati vulnerable groups tulad ng IPs/ICCs, GIDAs at coastal at fishing communities.
Sasailalim ang mga benepisyaryo sa assessment at profiling upang maiugnay sila sa angkop na programa at partner agencies, alinsunod sa layunin ng administrasyon ni Pangulong Ferdinand Marcos Jr. na palawakin ang social protection.
Katuwang ng DOLE sa implementasyon ang Department of Education (DepEd), Bureau of Fisheries and Aquatic Resources (BFAR), TESDA, Public Employment Service Offices (PESOs), local government units (LGUs), iba pang ahensya at pribadong katuwang para sa mas sustainable na oportunidad. Jocelyn Tabangcura-Domenden
