MANILA, Philippines – Sinanay ang mahigit 530 military, police at Coast Guard personnel sa kanilang pagtugon sa malakas na lindol sa tatlong araw na interagency exercise.
Ang ikalawang Interagency Exercise, dubbed “Pagsasanay Sanlakas,” ay nagtipon sa mga tauhan mula sa AFP, Philippine National Police (PNP) at Philippine Coast Guard (PCG) sa tabletop at field exercises mula Miyerkules hanggang Biyernes.
Isinagawa sa drill ang simulation ng search and rescue, humanitarian assistance, triage at maritime casualty evacuation kasunod ng malakas na lindol.
Layon ng exercise na sanayin ang abilidad ng mga ahensya na makipag-ugnayan sa mga tauhan at resources, at magsagawa ng joint disaster response sa lupa at dagat.
Nagsilbing lead agency ang PCG dito.
Binuksan ang exercises noong Miyerkules sa PCG National Headquarters bago ang field activities na isinagawa naman sa Eva Macapagal Super Terminal sa Pier 15.
Iginiit ni PCG Deputy Commandant for Operations Vice Adm. Edgar Ybañez ang kahalagahan ng tatlong ahensya na magtulungan sa paghahanda sa malalaking kalamidad.
Ang exercise ay inorganisa ng Joint AFP-PNP-PCG Education, Training and Doctrine Cell, na nangasiwa sa joint training at doctrine sa tatlong serbisyo.
Dumalo naman sa closing ceremony sina PCG Commandant Adm. Ronnie Gil Gavan, AFP Vice Chief of Staff Lt. Gen. Rommel Roldan and PNP Deputy Director for Education at Training Brig. Gen. Romeo Ruel Berango nitong Biyernes.
Nagsilbing exercise director si Rear Adm. Christopher Meniado. RNT/JGC
