MANILA, Philippines – Binuwag ang drug den sa Midsayap, Cotabato, dahilan para maaresto ang tatlong high-value targets at marekober ang dalawang fragmentation grenades at P47,000 halaga ng shabu.
Ayon sa Philippine Drug Enforcement Agency (PDEA), ang operasyon ay isinagawa 1:45 ng hapon nitong Biyernes sa Barangay Upper Labas ng PDEA-Bangsamoro Autonomous Region in Muslim Mindanao (PDEA-BARMM).
Kinilala ni Eugene Morcilla, PDEA provincial officer for the BARMM Special Geographic Area, ang mga suspek na sina alyas “Tammy,” “Vern” and “Roel,” na isang buwan nang minamanmanan.
Dahil sa operasyon ay naantala ang illegal drug network na tumatakbo sa lugar, ayon naman kay PDEA-BARMM Regional Director George Paul Alcovindas.
Ang tatlong suspek ay naka-detain na sa PDEA-BARMM facility sa Cotabato City at nahaharap sa reklamong paglabag sa Republic Act No. 9165, o Comprehensive Dangerous Drugs Act of 2002, at RA 10591, o Comprehensive Firearms and Ammunition Regulation Act. RNT/JGC
