MANILA, Philippines – Pinuri ni Senator Bam Aquino ang 447-kataong delegasyon ng Pilipinas at lahat ng atletang Pilipinong nagkamit ng medalya sa katatapos na 20th Asian Games sa Aichi-Nagoya, Japan, matapos makamit ang pinakamaramingm medalya ng bansa sa quadrennial meet sa loob ng anim na dekada.
Ayon pa kay Aquino, ipinapakita ng mahusay na performance ng bansa ang pangangailangan para sa tuloy-tuloy na pagsuporta sa grassroots sports development, pagsasanay ng mga atleta, mga pasilidad para sa sports, coaching, at mga support program upang mabigyan ng mas maraming Pilipino ng pagkakataong matuklasan, mapaunlad, at maipamalas ang kanilang mga talento sa pambansa at pandaigdigang antas.
Sa kanyang Senate Resolution No. 702, pinuri ni Aquino ang Philippine team sa pag-uwi nito ng 29 medalya — apat na ginto, siyam na pilak, at 16 na tanso — sa iba’t ibang sports sa paligsahang ginanap mula Setyembre 19 hanggang Oktubre 4, 2026.
Ang kabuuang medal tally ng bansa ang pinakamalaki mula nang makakuha ito ng 42 medalya sa 1966 edition ng Asian Games sa Bangkok, Thailand. Nalampasan din ng team ang 18-medal haul ng bansa noong 2022 Asian Games.
“With the valiant effort of our Filipino athletes in their respective events, the Philippines delivered an impressive performance, garnering four (4) gold medals, nine (9) silver medals, and sixteen (16) bronze medals across various sports,” ani Aquino.
Kabilang sa gold medalists sina two-time Olympic gold medalist Carlos Edriel Yulo sa men’s vault at floor exercise sa artistic gymnastics; Ernest John “EJ” Obiena sa men’s pole vault; at Jesus Gabriel Derick Yape sa mixed individual virtual taekwondo.
Nagwagi naman ng silver medal sina Jean Claude Saclag sa MMA; ang Gilas Pilipinas Women sa 3×3 basketball; sina Abegail Sinogbuhan, Jean Marie Sucalit at Jay Salon sa women’s doubles sepak takraw; Amaya Amparo Cojuangco sa archery; sina Juliana Mykhail Candelaria, Tachiana Mangin at Kurt Bryan Barbosa sa taekwondo; Carlo Paalam sa boxing; at Alex Enriquez sa jiu-jitsu.
Kabilang naman sa bronze medalists sina Princess Catindig, Bien Zoleta, Christy Sanosa, Shyryn Salazar, at Hilary Paas sa women’s team soft tennis; Samantha Veguillas, Ysabielle Arrogante, at Rebecca Torres sa women’s team kata sa karate; Marie June Adriano sa women’s individual kumite; Karl Jahrel Eldrew Yulo sa men’s horizontal bar sa artistic gymnastics; Albert Ian Delos Santos sa men’s 70kg weightlifting; John Cabang Tolentino sa men’s 110m hurdles; at sina Lance David, Ducke Harnold Leoncio, Lawrence Anthony Gatmaitan, Kim Rey Salazar, Robert John Mempin, at Michael Vaughan Ocio ng Team Sibol sa Pokémon UNITE Esports.
Ang iba pang nagkamit ng bronze medal ay sina Jason Huerte, Glindel Phori, Jom Rafael, Reynaldo Asilum Jr., at Ronsited Gabayeron sa men’s regu sepak takraw; Golden Dajao, Dragon Dajao, Charles Esguerra, Chammy Nazarrea, at Justine Tan ng Sibol sa Honour of Kings Esports; Jayuard Alciso sa men’s shortboard surfing; Carlos Alvarez sa men’s traditional 77kg MMA; Victoria Bossong sa women’s 800m; Alex Eala sa women’s singles tennis; Jesus Gabriel Derick Yape sa men’s individual poomsae taekwondo; Khylem Harl Progella at Sofiah Shanine Pagara sa women’s beach volleyball; at Kaila Jenna Napolis sa women’s 52kg jiu-jitsu.
“The achievements of the Philippine delegation reflect not only the individual excellence and determination of its medalists but also the collective efforts of all Filipino athletes, coaches, trainers, and support personnel who have worked to represent the country with distinction,” wika ni Aquino.
Higit pa sa kanilang mga tagumpay at medalya, binigyang-diin ni Aquino na nagsisilbing huwaran sa kabataan ang mga atletang Pilipino, na ipinapakita kung paano makatutulong ang disiplina, tiyaga, at dedikasyon upang mapaunlad ang kanyang talento, malampasan ang mga hamon, at maabot ang kanyang mga pangarap. Ernie Reyes
